Bozjyra shatqalynda vızıt ortalyqtyń qurylysy aıaqtaldy
AQTAÝ. KAZINFORM — Mańǵystaý oblysyndaǵy biregeı tabıǵı nysan – Bozjyra shatqaly aýmaǵynda týrısterge arnalǵan vızıt ortalyqtyń qurylysy aıaqtaldy. Joba osy aıda iske qosylady dep kútilýde. Sonymen qatar, tanymal týrıstik orynda taǵy eki ınvestıtsııalyq joba júzege asyrylmaq.
Aıta keteıik, Bozjyra shatqaly - álem jurtshylyǵyn tamsandyratyn erekshe tabıǵı mekenderdiń biri. Sondyqtan óńirde týrısterge qyzmet kórsetý sapasyn arttyrý jáne zamanaýı ınfraqurylymdy damytý baǵytynda keshendi jumystar qolǵa alynǵan.
Mamandardyń aıtýynsha, búginde shatqal sheteldik saıahatshylar arasynda keńinen tanymal. Munda Italııa, Frantsııa, Qytaı, Japonııa, Taıland elderinen kelgen týrısterdi kóp kezdestirýge bolady. Olardy ásirese mıllıondaǵan jyldar boıy jel men sýdyń áserinen qalyptasqan borly taýlar men erekshe landshaft qyzyqtyrady.
Frantsııanyń Renn qalasynan kelgen týrıst Gúlven Jýgon súıiktisimen birge úsh aıdan beri álemdi aralap júr. Ózbekstannan keıin Mańǵystaýǵa kelgen olar Bozjyra shatqalynan erekshe áser alǵan.
- Mańǵystaýǵa kelgenimizge bes kún boldy. Mundaǵy halyqtyń turmys deńgeıi joǵary, óńir ekonomıkasy jaqsy damyǵan. Qyzmet kórsetý salasy men qonaq úıler de jaqsy deńgeıde. Al tabıǵaty tipti tańǵajaıyp. Bozjyra – óz aldyna bólek álem, naǵyz kartına ispetti, - deıdi frantsýıalyq týrıst Gúlven Jýgon.
Al Astana qalasynan arnaıy kelgen týrıst Dınara Tólemisova da shatqaldyń sulýlyǵyna tánti bolǵanyn aıtady.
- Ataqty Bozjyra shatqalyn kórý úshin arnaıy keldim. Rasynda da, óte ádemi jer. Mańǵystaý qasıetti oryndar men erekshe landshafty aımaqtarǵa baı óńir eken. Qurbym ekeýmiz úsh kúnnen beri tarıhı jerler men tabıǵatty tamashalap kelemiz, - deıdi Astanalyq týrıst.
Bozjyra shatqatynda týrısterge jaǵdaı jasaý úshin alǵashqy vızıt ortalyqtyń qurylysy aıaqtaldy. Joba jetekshisi Áset Shámbilovtyń aıtýynsha, abattandyrý jumystaryn aıaqtap, ortalyqty osy aıda iske qosý josparda.
- Bul jerde týrısterge baǵyt-baǵdar beriledi. Bilesizder, Bozjyra shatqaly ornalasqan aýmaq kezinde muhıttiń túbi bolǵan. Akýlalardyń tisterin qoıyp, shaǵyn murajaı jasaımyz. Sonymen qatar, tamaqtanýǵa da bolady. Kúnine 50 - 60 adamǵa qyzmet kórsete alamyz. Ortalyq shatqaldan 18 shaqyrym qashyqtyqta, negizgi joldyń boıynda ornalasqan, - deıdi joba jetekshisi Áset Shámbilov.
Mańǵystaý oblystyq týrızm basqarmasy basshysynyń orynbasary Nursultan Ǵınııattyń málimetinshe, Bozjyra shatqalynda taǵy eki joba júzege asyrylyp jatyr.
- Bozjyra shatqalynda 2025 jyldan bastap 3 ınvestıtsııalyq joba iske asyrylýda. Kólemi 3 mıllıardqa jýyq ınvestıtsııa jumsalýda. Jańadan alpysqa jýyq jumys orny ashylady. Úlken vızıt ortalyqtar, etnokafeler men meıramhanalar ashý josparda. Jalpy oblysta týrısterge qyzmet kórsetý salasy damyp keledi. Byltyr 20 mıllıardtan astam somanyń qyzmeti kósetildi, - deıdi Nursultan Ǵınııat.
Byltyr Mańǵystaý oblysyna 420 myń týrıst kelgen. Onyń 380 myńy – Qazaqstan azamattary, al 44 myńǵa jýyǵy – sheteldikter. Mamandardyń aıtýynsha, týrısterdiń basym bóligi Bozjyra shatqalyn kórýge arnaıy barady.
Buǵan deıin, Mańǵystaýdaǵy Beket ata jáne jerasty meshitteriniń tarıhy týraly jazǵan bolatynbyz.
