Bozjyra shatqalynda qandaı nysandar boı kóteredi
ASTANA. KAZINFORM — Mańǵystaý oblysy Qaraqııa aýdanyndaǵy týrıstik orynda 2029 jylǵa deıin birqatar ınvestıtsııalyq joba iske asyrylmaq. Bul jóninde QR Týrızm jáne sport mınıstrligi resmı saýalymyzǵa joldaǵan jaýabynda málimdedi.
— Bozjyra sapar-ortalyǵy salyndy. Joba bastamashysy ári ınvestor — «Visit Aktau LTD» JShS. Ol 20 ýaqytsha, 5 turaqty jumys ornyn qamtamasyz etti. Qazirgi tańda ǵımarat qurylysy aıaqtalyp, kógaldandyrý jumystary júrgizilip jatyr. Nysan bıyl iske qosylady, — delingen habarlamada.
Sondaı-aq 2026-2027 jyldarda etno-kofehanany paıdalanýǵa berý josparlanyp otyr. Al 2027-2028 jyldarda glempıng bazasy daıyn bolady. Odan bólek, úlken qonaqúı salynbaq.
— «Bozjyra Safari Hotel» qonaqúı kesheni boı kóteredi. Joba bastamashysy — «Oasis Development» JShS. Kompanııa 30 turaqty, 80 ýaqytsha jumys ornyn usynady. Qazir jobaǵa qajetti jer ýchaskesi rásimdelip jatyr. Qurylys 2028 jyly aıaqtalady, — delingen resmı jaýapta.
Sonymen qatar Bozjyra shatqalyna aparatyn arnaıy jol salynyp jatyr. Uzyndyǵy — 14,9 shaqyrym.
Týrıstik ornyn kórý alańyn elektr qýatymen jabdyqtaý boıynsha jobalyq-smetalyq qujattama da ázir bolǵan.
Aıta keteıik, buǵan deıin Mańǵystaýdaǵy Bozjyra shatqalyna qatynaý jeńildeıtinin jazǵanbyz.
