Bozjyra shatqalynda ekinshi vızıt ortalyqtyń qurylysy bastaldy
AQTAÝ. KAZINFORM — «Bozjyra» vızıt ortalyǵy barlyq ekologııalyq talaptarǵa saı bolmaq.
Qurylys jumystaryna jınalmaly jeńil konstrýktsııalar qoldanylýda. Sebebi, olar tereń irgetasty qajet etpeıdi. Joba boıynsha qaldyq sýdy tazartatyn bıotazartý júıeleri, qoqysty suryptap jınaý, kún sáýlesinen elektr energııa alý qarastyrylǵan.
Qaraqııa aýdandyq kásipkerlik jáne týrızm bóliminiń basshysy Naǵıma Mekenovanyń málimetinshe, joba týrısterdiń artýyna yqpal etip, aýdannyń damýyna oń áserin tıgizbek.
- Qaraqııa aýdanyna qarasty Bozjyra qoryǵynda vızıt ortalyq jáne glempıngteri bar etno-kafeniń qurylysy júrgizilýde. Investor «PanaAsia» JShS, joba quny – 2 mıllıard teńge. Joba júzege asqanda aýdanymyz kórkeıip, týrıster aǵyny kóbeıedi dep senemiz, - deıdi bólim basshysy.
Joba aıasynda týrısterdiń qaýipsizdigi men jaıly tynyǵýyna jaǵdaı jasalady. Sonymen qatar, qonaqtarǵa aımaqtyń erekshe tabıǵatymen tolyǵyraq tanysýǵa, kóshpendi halyqtyń dástúrli mádenıetiniń rýhyn sezinýge múmkindik bolady.
Vızıt ortalyqta otyzǵa jýyq jumys orny ashylyp, oǵan jergilikti mamandardy alý kózdelgen. Sonymen birge, jaqyn mańdaǵy aýyl turǵyndaryna aýylsharýashylyq ónimderin satýyna jaǵdaı jasalady. Ortalyqtyń qurylys jumystaryn bıyl jyl sońyna deıin aıaqtaý josparlanǵan.
Aıta keteıik, Bozjyra shatqaly - álem jurtshylyǵyn tamsandyratyn erekshe tabıǵı meken. Byltyr aımaqqa 420 myń týrıst kelgen bolsa, sonyń basym bóligi Bozjyraǵa barǵan.
Buǵan deıin, Bozjyra shatqalynda alǵashqy vızıt ortalyqtyń qurylys jumystary aıaqtalǵanyn jazǵan edik.
