Bozymbaev jaqsy kóretin sporty týraly aıtyp berdi
ASTANA. QazAqparat - QR Energetıka mınıstri, Halyqaralyq qazaq kúresi federatsııasynyń prezıdenti Qanat Bozymbaev ulttyq sport túrlerine qatysty kózqarasyn bildirdi, dep habarlaıdy QazAqparat.
«Ulttyq kúrespen aıta qoıarlyqtaı baılanysym bolǵan joq. Jalpy, men «asfalttiń qazaǵymyn». Biraq, kásibı bokspen aınalystym. Aıtarlyqtaı da jetistikter de bar. Bala kezimde 2 jyl dzıýdomen aınalystym. Odan keıin dene bitimim kúresýge múmkindik bermedi. Óıtkeni óz jasyma qaraǵanda boıym uzyn boldy», - dedi mınıstr Ortalyq kommýnıkatsııalar qyzmetinde «Halyq barysy» respýblıkalyq týrnıri jobasynyń bastalýyna arnalǵan baspasóz máslıhatynda.
Sonymen qatar Qanat Bozymbaev Qazaqstanda ulttyq sport túrlerin damytýǵa qatysty oılarymen bólisip, federatsııa ótkizetin sharalarǵa toqtaldy.
«Boksty óte jaqsy damytyp júrgen jaýapty adamdar bar. Menińshe, ol jaqqa aralasýdyń da qajeti joq, jaı ǵana olarda bári de jemisti bolýyna tilekshi bolý qajet. Ulttyq kúresimizge qatysty aıtar bolsam, osydan birneshe jyl buryn Arman Shoraevpen tanystym. Ol bizdi atalǵan sport túrin qoldaýǵa shabyttandyrdy. Bastapqyda respýblıkalyq federatsııada qurmetti prezıdent bolyp, birge «Eýrazııa barysyn», «Álem barysyn» ótkizdik. Jańa týrnırler, jańa formattar. Sodan keıin biz halyqaralyq federatsııa qurdyq, qazir uıymǵa 15 el kiredi», - dedi ol.
Onyń aıtýynsha, aǵymdaǵy jyly Mádenıet jáne sport mınıstrliginiń qoldaýymen alǵash ret shetelde Azııa jáne Eýropa chempıonattary uıymdastyrylatyn bolady.
Aıta keteıik, elimizde alǵash ret beldesý kúresinen «Halyq barysy» respýblıkalyq týrnıri 7-8 mamyr kúnderi Almatyda, ashyq aspan aıasynda ótedi. Týrnırge kez kelgen azamat qatysa alady.
Munan bólek, jýrnalıster arasynda «Aqparat» barysy da bıyl ótetin bolady.
