Bozymbaev Teńizdiń óndiristik qýattylyǵyn arttyrýdaǵy Qazaqstannyń úlesin atady

ASTANA. QazAqparat - Batys Qazaqstanda ornalasqan Teńiz ken ornynda óndiristik qýattylyqty arttyrý jobasyndaǵy qazaqstandyq úles 36 paıyzdy quraıdy. Bul týraly búgin elordada ótip jatqan «Kazakhstan Global Investment Roundtable» forýmy aıasynda BAQ ókilderine suhbat bergen QR Energetıka mınıstri Qanat Bozymbaev aıtty, dep habarlaıdy QazAqparat.

«Energetıka salasyna ınvestıtsııa tartý qarqyndy júrip jatyr. Eń bastysy jalpy quny 37 mlrd  dollardy quraıtyn  Teńiz ken ornyn keńeıtý jobasy bar. Atalǵan qarjynyń biraz bóligi Atyraý oblysyna quıylyp jatyr. 27 myń adam sol jobada jumys isteýde. Álemniń 100-den astam kompanııasy qatysýda», - dedi ol.

Osy rette mınıstr ken ornyn keńeıtý  barysyndaǵy  qurylys jumystarynda da, burǵylaý jumystarynda da qazaqstandyq úlestiń joǵary bolatyndyǵyn aıtty.

«Qurylys jumystaryndaǵy qazaqstandyq kompanııalardyń úlesi 60 paıyzǵa jaqyn bolady. Al burǵylaý jumystaryndaǵy úlesimiz 50 paıyzdan asyp jyǵylady. Jalpy jobadaǵy qazaqstandyq úles 35-36 paıyzdy quraıdy», - dedi Qanat Bozymbaev.

Eske sala keteıik, 2016 jyldyń 5 shildesinde «Teńizshevroıl» JShS Batys Qazaqstanda ornalasqan Teńiz ken ornynyń óndiristik qýattylyǵyn arttyrýdyń kelesi satysy bolyp tabylatyn Keleshek keńeıý jobasy men Uńǵy erneýindegi qysymdy basqarý jobasyn (KKJ-UEQBJ) qarjylandyrýǵa qatysty aqyrǵy sheshimniń qabyldanǵanyn habarlaǵan bolatyn.