Bozymbaev Reseıdiń AI-92 benzınine táýeldilik qashan joıylatynyn aıtty

ASTANA. QazAqparat - Qazaqstandaǵy munaı óńdeý zaýyttarynda óńdelgen ónimder kólemi úsh mln. tonnaǵa artady. Bul týraly búgin QR Energetıka mınıstrliginiń alqa májilisinde atalǵan vedomstvonyń basshysy Qanat Bozymbaev málim etti, dep habarlaıdy QazAqparat. 

«Memleket basshysy óz Joldaýynda munaı óńdeý kólemin arttyrý qajettigin erekshe atap ótti. Úsh otandyq munaı óńdeý zaýytyn jańǵyrtqannan soń munaı óńdeý kólemi 2019 jyldan keıin 14,5-ten 17,5 mln. tonnaǵa deıin ósedi. Tústi munaı ónimderiniń, ıaǵnı benzın, dızel otyny, avıaotynnyń óndirisi artady»,-dedi mınıstr.

Bozymbaevtyń sózine qaraǵanda, jańǵyrtylǵan munaı óńdeý zaýyttary iske qosylyp, jobalyq qýatyna kóshken kezde elimizdiń ishki qajettiligin otandyq munaı ónimderimen tolyqtaı qamtamasyz etýge múmkindik bolady.

«Osy jumystardyń nátıjesinde janar-jaǵarmaı ımportyna táýeldilik joıylady dep kútilýde»,-dep atap ótti vedomstvo basshysy.
Aıta keteıik, búginde Qazaqstanǵa janar-jaǵarmaıdyń qajetti bir bóligin Reseıden tasymaldanýda. Ásirese, suranysy joǵary AI-92 benzıni kórshiles elden ımporttalýda.