Bozymbaev polıetılen paketterge qatysty: Tyıym salý ádisin qoldanbaımyz
ASTANA. QazAqparat - QR Energetıka mınıstri Qanat Bozymbaev bir rettik polıetılen paketterden kezeń-kezeńimen bas tartý týraly usynysty túsindirip berdi, dep habarlaıdy QazAqparat tilshisi.
«Árıne, áleýmettik jelilerdi qaraımyn, ásirese Feısbýkte bizdi talaı adam kelejdep otyr. Energetıka mınıstrliginiń polıetılen paketten basqa isi joq deıdi. Shyn máninde, kóptegen qoǵamdyq uıymdar men ekologtar mınıstrlikke júgingen soń, atalǵan máseleni qolǵa aldyq», - dep jaýap berdi mınıstr Úkimet úıinde ótken baspasóz máslıhatynda jýrnalıster suraǵyna.
Onyń aıtýynsha, mundaı úndeýler 2019 jyldyń 1 qańtarynda kúshine enetin Ekologııalyq kodekske sáıkes, polıetılen men ózge de zııandy zattardy kómýge tyıym salýmen tikeleı baılanysty.
Sondaı-aq, mınıstr polıetılenniń kóptegen jyldar boıy shirimeıtinin, qorshaǵan ortaǵa úlken zııan keltiretinin basa aıtty. Mysal retinde, ol aınalasy ushyp júrgen paketke tolǵan Astanany atap kórsetti.
«Biz tyıym salý ádisin qoldanbaımyz. Qazir, eń aldymen halyqaralyq tájirıbeni zerttep, balamasyn tabýymyz kerek. Eger elimizdegi halyq úshin quny shamalas, tabıǵı túrde joıylatyn nemese ekinshi óndiristen shyqqan qaǵaz paketter syndy balama tabylsa, polıetılen paketti almastyrýǵa kirisemiz. Iá, tym bolmasa, paketti tegin taratpaý usynysy da qaralyp jatyr. Ózim túrli óńirlerde turyp kórdim: eldiń ońtústiginde tegin taratady, soltústiginde - satady. Sondyqtan, ortaq bir mámilege kelý kerek», - dep óz sózin tolyqtyrdy Q.Bozymbaev.
Mınıstr bul baǵyttaǵy jumystardyń jyl boıy júrgiziletinin atap ótti. Barlyq talqylaýlar ashyq jáne qoǵamdyq uıymdarmen birlesip ótkiziledi. Sodan keıin ǵana qajetti sheshimder qabyldanady.
