Bozymbaev orynbasarlarynyń ustalýy jaıynda: Men ázirge eshteńe aıta almaımyn

ASTANA. QazAqparat - Búgin elordada halyqqa esep berý kezdesýi barysynda QR Energetıka mınıstri Qanat Bozymbaev orynbasarlarynyń ustalýyna qatysty pikir bildire almaıtyndyǵyn aıtty, dep habarlaıdy QazAqparat tilshisi.

«Ókinishke qaraı, pikir bildire almaımyn. Óıtkeni tergeý sharalary júrip jatyr. Árıne, men joldastarymdy oılaımyn. Meniń qandaı da pikirim tergeý isine aralasý jáne qysym kórsetý retinde túsindirilýi yqtımal. Sondyqtan da bul máselege jarııa túrde múldem pikir bildire almaımyn. Eger osy máselege qatysty qandaı da bir aqparattardy bilgińiz kelse, advokattardan, tergeýshilerden surańyz», - dep jaýap berdi mınıstr kezdesýge qatysýshylardyń tarapynan qoıylǵan suraqqa.

Esterińizge sala ketsek, Sybaılas jemqorlyqqa qarsy is-qımyl ulttyq bıýrosy Energetıka vıtse-mınıstri Ǵanı Sádibekovti ustaǵan edi. Oǵan «Aımaq» JShS merdiger uıymynyń basshysymen qylmystyq kelisimde Şýchınsk-Býrabaı kýrorttyq aımaǵyndaǵy kóldi tazartýǵa bólingen asa iri kólemdegi bıýdjettik qarajatty jymqyrdy degen aıyp taǵylǵan.

Odan keıin Energetıka vıtse-mınıstri Baqytjan Jaqsalıev te para alý kúdigimen ustalǵan bolatyn.