Bozymbaev: Meniń benzın baǵasyna boljam aıtatyn quqyǵym joq

ASTANA. QazAqparat - Úkimet otyrysynan keıingi baspasóz máslıhaty barysynda jýrnalısterdiń suraǵyna jaýap bere otyryp, Energetıka mınıstri Qanat Bozymbaev benzın baǵasy týraly boljam aıtpaıtynyn málim etti, dep habarlaıdy QazAqparat tilshisi.

«Birinshiden, aıtarym, men naryqtaǵy ınflıatsııalyq jaǵdaıǵa boljam jasaıdy dep eshqashan kútpeńizder. Sebebi, men baǵa qymbattaıdy dep boljam jasasam, baǵa qymbattap ketýi ábden múmkin. Sondyqtan, meniń bundaı boljam jasaýyma qaqym joq»,-degen mınıstr janar-jaǵarmaı baǵasyna qatysty naryqtaǵy jaǵdaıǵa toqtaldy.

«Jalpy, meniń aıtarym, janar-jaǵarmaıdyń birneshe túri bar. Halyq arasynda kóp suranysqa ıe jáne baǵasy kóp alańdatatyny - ol «Aı-92» markaly benzın men dızel otyny. Benzınge qatysty aıtar bolsam, Aı-92 benzıniniń baǵasy 30 paıyzǵa Reseı naryǵyna táýeldi. Osy kúnge deıin 70 paıyzyn ishki naryqtaǵy óndiris esebinen jaýyp kelemiz, 30 paıyz ımporttap kelemiz. Qarasha-jeltoqsan aılarynda baǵa qymbattady. Endi baǵa biraz ýaqytqa deıin turaqtanady dep oılaımyn. Al, Reseı federatsııasynda qazir jerasty baılyqtaryn paıdalaný salasynda salyqtyq reformalar júrip jatyr. Bul árıne munaı salasyna da qatysty, óıtkeni, salyqtyń kóbi osy salada. Sondyqtan, jaǵdaıdy áli qarastyramyz. Men áriptesim, Reseıdiń energetıka mınıstrimen tikeleı baılanys ustap otyrmyn»,-dedi Q.Bozymbaev,

Mınıstr atap ótkendeı, Aı-92 markaly benzınniń bir lıtri 133 teńgeden 139 teńgege deıin qymbattasa, dızeldi janar-jaǵarmaıdyń baǵasy 128-130 teńge deńgeıinde turaqtanyp tur.