Bozymbaev qaraýsyz qalǵan elektr jelileriniń qaýipti ekenin aıtty
ASTANA. QazAqparat - QR Energetıka mınıstri Qanat Bozymbaev qaraýsyz qalǵan elektr jelileri qaıǵyly oqıǵalarǵa sebep bolýy múmkin ekenin aıtty, dep habarlaıdy QazAqparat.
«Elimizdiń birqatar óńirlerinde qaraýsyz turǵan jeliler bar, ıaǵnı olarǵa eshkim qyzmet kórsetpeıdi nemese qalaı bolsa solaı salǵyrt qaraıdy. Bul óz kezeginde atalǵan jelilerge qosylǵan tutynýshylardyń elektr qýatymen qamtamasyz etilýine kedergi týdyrady. Jergilikti atqarýshy organdardyń sońǵy málimetterine qaraǵanda, osyndaı jeliler 2 110 shaqyrymǵa sozylyp jatyr jáne 631 ıesiz transformatorlyq qosalqy stansa bar kórinedi. Eger de bul jelilerdi energııa beretin uıymdardyń qaraýyna ótkizbese, onda jaqyn arada olar apattardyń kózine aınalady, sondaı-aq elektr qýatymen qamtamasyz etý sapasynyń tómendeýine sebebi bolady. Munymen qosa, qaıǵyly oqıǵalarǵa da soqtyrýy múmkin»,-dedi Bozymbaev Májilistiń jalpy otyrysynda.
Onyń sózine qaraǵanda, atalǵan jelilerdi óńirlik elektr kompanııalarynyń qaraýyna berý arqyly bul máseleni sheshýge bolady, alaıda qoldanystaǵy zańnamada bundaı qadamdar eskerilmegen.
Osy oraıda zańnamalyq aktilerge elektr energetıkasy máseleleri boıynsha ózgerister men tolyqtyrýlar engizý týraly zań jobasynda ıesiz ári qaraýsyz dep tanylǵan jelilerdi ótkizý tetikteri qarastyrylyp otyr.
«Qaraýsyz turǵan elektr jelilerin arnaıy mamandary men tıisti tehnıkasy bar energııa beretin uıymdardyń qaramaǵyna ótkizý arqyly elektr qýatymen qamtamasyz etýdiń senimdiligin arttyrýǵa bolady»,-dedi mınıstr.
