Bozymbaev Qalamqastaǵy órt jaıynda: Basty másele jalyndy toqtatý bolyp tur
ASTANA. QazAqparat - QR Energetıka mınıstri Qanat Bozymbaev «Qalamqas» munaı-gaz ken ornyndaǵy órtke qatysy pikir bildirdi, dep habarlaıdy QazAqparat tilshisi.
«Nashar tsementtelgen nemese karotaj jumystaryn nashar júrgizýi múmkin. Qazir eń basty másele - ony qalaı toqtatýda bolyp tur. Birinshi orynbasarym (birinshi vıtse-mınıstr Mahambet Dosmuhambetov - avt) sol jaqta, oqıǵa ornynda. Ol jumys jasap jatyr. Búgin sol jerde shtab qandaı da bir negizgi sheshim qabyldaıtyn bolady. Vıdeoda gaz, ga-sý qospasy janyp jatyr. Zardap shekkender joq, ol jerde kásibı munaıshylar jumys isteıdi. Eldi meken alshaq ornalasqan. Munan úlken tragedııa jasaýdyń qajeti joq. Mán-jaıdy anyqtaımyz, kinálini anyqtaımyz. Olar shyǵyndy óteıtin bolady», - dedi Qanat Bozymbaev Úkimet otyrysynan keıin BAQ ókilderine bergen suhbatynda.
Eske sala keteıik, 25 naýryz kúni saǵat 07-10-da Mańǵystaý oblystyq TJD kezekshi-dıspetcherlik qyzmetine Mańǵystaý aýdanyndaǵy «MańǵystaýMunaıGaz» AQ-tyń «Qalamqas» munaı ken ornyndaǵy uńǵymalardyń birinen shyqqan gaz janyp, bıikti 10 metrge deıin jalyn atqylap turǵandyǵy týraly habarlama túsken. Órt aýmaǵy 900 sharshy metrdi quraǵan.
Onyń aldynda, 13 naýryzynda Mańǵystaý oblysyndaǵy «Qalamqas» munaı-gaz ken ornynda «Sı Bý» ınjenerlik burǵylaý kompanııasy» JShS jobalyq tereńdigi 903 metrlik №8237 uńǵymasyn burǵylaý barysynda gaz-sý qospasy atqylap, tótenshe jaǵdaı bolǵan edi. Atalǵan fakti boıynsha Energetıka mınıstrligi Munaı-gaz keshenindegi memlekettik ınspektsııasy batys óńiraralyq basqarmasy men Mańǵystaý oblystyq ekologııa departamenti «Mańǵystaý munaıgaz» AQ-ǵa qatysty tekserý taǵaıyndaǵan.
