Bozymbaev eń iri úsh ken ornynan qansha munaı óndiriletinin aıtty
ASTANA. QazAqparat - Bıyl Qashaǵannan 5 mln. tonna munaı óndiriletindigi boljanýda. Bul týraly búgin «Arnasaı» Jasyl tehnologııalar ortalyǵynda QR Energetıka mınıstrligi Qoǵamdyq keńesiniń kóshpeli otyrysynda belgili boldy, dep habarlaıdy QazAqparat.
«Munaı-gaz salasy úshin 3 iri ken ornyndaǵy jobalardy tabysty júzege asyrý barynsha mańyzdy. Onyń birinshisi - Qashaǵan. 2017 jyldyń 3 aqpanynda «D» aralyndaǵy birinshi uńǵyma, 2017 jyldyń naýryzynda «ARS-3» birinshi uńǵymasy iske qosyldy. Qazirgi ýaqytta óndirý kólemin táýligine 270 myń barrelge jetkizý maqsatynda shıki gazdy aıdaý qurylǵysyn iske qosý jumystary jalǵasýda», - dedi QR Energetıka mınıstri Qanat Bozymbaev otyrys barysynda.
Onyń dereginshe, aǵymdaǵy jyly atalǵan ken ornynan shamamen 5 mln. tonna munaı men 3,1 mlrd. tekshe metr gaz óndirý josparlanǵan. Aıta keterligi, aǵymdaǵy jyldyń 4 aıynda Qashaǵannan 2,2 mln. tonna munaı óndirildi.
«Al 2017 jyly Qarashyǵanaqta 11,8 mln. tonna munaı men 18 mlrd. tekshe metr óndirý josparlanǵan. 7 aıdyń ishinde 4,3 mln. tonna suıyq kómirsýtegi óndirildi. Bul ótken jylǵy kórsetkishten 12 paıyzǵa artyq», - dedi ol.
Mınıstrdiń aıtýynsha, jyl sońyna deıin Teńiz ken ornynan 27,5 mln. tonna munaı men 4,5 mlrd. tekshe metr gaz óndirý kózdelgen. Osy jyldyń 4 aıynda bul ken ornynan 9,7 paıyz munaı alyndy. Bul ótken jylǵy kezeń kórsetkishimen birdeı.
