Bozymbaev dızel otyny baǵasyna alańdaýly
ASTANA. QazAqparat - Reseımen shekaralas óńirlerde benzın men dızel otynyn tutyný kóleminiń artýy olardyń kórshi naryqqa ketip jatqanyn bildiredi. Bul týraly QR Energetıka mınıstri Qanat Bozymbaev aıtty, dep habarlaıdy QazAqparat tilshisi.
«Reseımen shekaralas óńirlerde dızel otyny men benzındi tutyný kólemi kúrt artty. Búgingi kúni 3 mln adam turatyn Túrkistan oblysy men Shymkent qalasyna qaraǵanda 700-800 myń adamy bar Batys Qazaqstan ne bolmasa Qostanaı oblystaryn qosa alǵanda sońǵy ýaqytta tutynylatyn janarmaı kólemi birneshe ese kóp bolyp otyr. Bul dızel otyny men benzın Reseı Federatsııasyna ketip jatyr degendi bildiredi. Shekaramyzdyń úlken ekendigi, kedenniń joqtyǵy belgili. Degenmen, bul faktilerdi Premer-Mınıstrge jetkizdim. Ol orynbasary Dosaevqa tapsyrma berdi. Biz usynys ázirleýimiz kerek», - dedi ol ishki naryqtaǵy janar-jaǵarmaı baǵasy talqylanǵan keńeste.
Mınıstr osy rette elimizdegi benzın men dızel otynynyń baǵasyn kótermeý qajettigine basa nazar aýdardy.
«Degenmen, biz shekaramyzdy baqylaýda ustaýymyz qajet. Juma kúni Úkimette naryǵymyzdy qorǵaý nusqalary týraly baıandaıtyn bolamyz. Ekinshi joly - baǵany Reseımen teńestirý qajet. Mundaı jaǵdaıdyń bolýy, benzındi 240, dızel otynyn 250 teńge jetkizý fantastıka bolar edi. Degenmen bul da tyǵyryqtan shyǵýdyń bir joly. Osy jaıt oryn alatyn bolsa Úkimet tutynýshylardy sýbsıdııalaý boıynsha sharalar qabyldaıdy. Alaıda, biz birinshi, shekaramyzdy nyǵaıtý jolymen júretin shyǵarmyz», - dedi Qanat Bozymbaev.
