Bozymbaev: Búginnen bastap qazaq kúresiniń jańa dáýiri bastaldy
ASTANA. QazAqparat - Búgin Astanada Halyqaralyq qazaq kúresi federatsııasynyń quryltaı kongresinde Qanat Bozymbaev qazaq kúresin damytýdyń josparlarymen bólisti, dep habarlaıdy QazAqparat.
«Bul men úshin asa abyroıly mindet bolyp otyr. Senimderińizdi aqtaý úshin kúsh-jigerimdi aıamaımyn. Elimizdiń sporty úshin búgin tarıhı kún. Biz ulttyq sportymyzdyń jańa halyqaralyq uıymyn quryp, onyń quryltaılyq kongresin ótkizýdemiz. Astanaǵa álemniń 35 memleketinen delegattar kelip otyr. Osy oraıda búginnen bastap qazaq kúresiniń jańa dáýiri bastaldy dep aıtýǵa bolady. Bizdiń bastamany qoldaǵan seriktester kóp. Buryn qazaq kúresi ataýyn estimegen elderdiń ózinde jaqyn bolashaqta osy sport túriniń úıirmeleri ashylady», - dedi Qanat Bozymbaev.
Bul rette ol birqatar alys shetelderde qazaq kúresimen aınalysatyndar qatary arta túsetinin jetkizdi.
«Endi ulttyq kúresimizdi jańa deńgeıde damytý úshin biraz ózgerister jasaıtyn bolamyz. Meniń oıymsha, qazaq kúresinen mindetti túrde álem chempıonatyn eki jylda bir ret ótkizý kerek. Osy oraıda, tıisti reglamentti bekitemiz. Dál sol mezgilde «Álem Barysyn» ótkizip, oǵan Álem kýbogy mártebesin berý jospary da bar. Al eger «Eýrazııa Barysyna» toqtalsaq, ony Eýrazııa kýbogyna aınaldyryp jáne Azııa chempıonatyn jyl saıyn uıymdastyratyn bolamyz», - dedi HQKF prezıdenti.
Onyń sózine qaraǵanda, jastar men balalar arasynda jarystar da osy formatta ótkizý josparǵa engizilgen.
«Shet elderden bapkerler men mamandardy osynda shaqyrtyp, kúrestiń búkil qyr-syryna olardy úıretip, shákirtaqy tóleýge tyrysatyn bolamyz. Budan basqa, shet elderde qazaq kúresi sport zaldaryn ashýǵa qarjylaı kómekti qarastyrmaqpyz. Sondyqtan alǵa qoıylǵan maqsattar az emes. Osy oraıda iske barshamyz jumyla kiriseıik degen tilek bar», - dep málimdedi Qanat Bozymbaev.
Budan buryn habarlanǵandaı, búgin Astanada Halyqaralyq qazaq kúresi federatsııasynyń quryltaı kongresi ótip, oǵan álemniń 35 elinen ókilder qatysty. Kongress kezinde federatsııanyń jarǵysy bekitilip, oǵan qosa jańa uıymnyń qazaq kúresin aldaǵy tórt jylda damytý jumystarynyń jospary qabyldandy. Onda QR Energetıka mınıstri Qanat Bozymbaev Halyqaralyq qazaq kúresi federatsııasynyń (HQKF) prezıdenti bolyp saılandy. Sonymen qatar jıyn barysynda HQKF-nyń 5 vıtse-prezıdenti de bekitildi.
