Bozymbaev benzın baǵasynyń qymbattaýyn túsindirdi
ASTANA. QazAqparat - Jekelegen janarmaı quıý stansalaryna qatysty ákimshilik is qozǵaldy. Bul týraly Úkimettiń selektorlyq rejımdegi otyrysynda QR Energetıka mınıstri Qanat Bozymbaev málim etti, dep habarlaıdy QazAqparat.
«Avtomobıl benzınin óndirý kólemi 2 mln 270 myń tonnany, ótken jyldyń sáıkes kezeńimen salystyrǵanda 103,6 paıyzdy qurady. Respýblıka boıynsha AI-92 benzıniniń ortasha baǵasy qańtar aıynda lıtrine 135 teńge bolǵan edi. Al qyrkúıek aıynda 150 teńgege deıin qymbattap, ósim 11 paıyzǵa jetti», - dedi ol.
Onyń aıtýynsha, shilde-tamyz aıyndaǵy 15 paıyzdyq ımport úlesi qyrkúıekte 30 paıyzǵa jetken.
«Bul qyrkúıek-qazan aılarynda munaı óńdeý zaýyttaryn jańǵyrtýǵa baǵyttalǵan jóndeý jumystarymen baılanysty boldy. Sonyń saldarynan naryqta qazaqstandyq munaı ónimderi shekteýli usynylyp, quny qymbat ımporttyq benzın úlesi artty. Bul respýblıkanyń janarmaı beketterindegi baǵanyń ósimine túrtki boldy», - dedi Bozymbaev.
Mınıstrdiń dereginshe, mamyr aıymen salystyrǵanda shekaradaǵy ımporttalatyn benzınniń kóterme baǵasy 8 paıyzǵa kóterilip, tonnasy 517-den 560 dollarǵa qymbattaǵan.
«Bul rette dál sol kezeńdegi teńgege qatysty dollar baǵasynyń ózgergendigin de eskergen jón. Baǵam bir dollarǵa 314 teńgeden 340 teńgege deıin kóterilip ketti. Al reseılikpen barlyq esep aıyrysýlar dollarmen júrgiziledi. Buǵan qosa, jekelegen janarmaı quıý stansalaryna qatysty ákimshilik iz qozǵaldy», - dedi ol.
