Bozymbaev: Benzın baǵasyn tómendetýge múmkindik bar, biraq...
«Árıne, benzın baǵasyn tómendetýge múmkindik bar. Biraq, bul múmkindik tek qana 15-20 kúnge ǵana sozylady. Odan keıin janar-jaǵarmaı tapshylyǵy oryn alady. Óıtkeni, búgingi kúni biz ishki naryqqa qajetti benzınniń 30 paıyzyn Reseıden alyp otyrmyz. Otandyq naryqtaǵy benzın baǵasyn tómendetsek, Reseıden eshkim de benzın ákelmeıdi. Sodan keıin ary ketse 15-20 kúnde naryqta tapshylyq bolady. Árıne, ókinishke oraı baǵa kóterildi. Biraq, biz úsh zaýytty (Pavlodar, Shymkent jáne Atyraý munaı óńdeý zaýyttary) jańǵyrtýdan ótkizgennen keıin ǵana kenishterimizden munaı alyp, ony óńdep, óz baǵamyzben otandyq naryqta sata alamyz», - dedi Bozymbaev.
Máselen, onyń aıtýynsha, 1 jyldyń ishinde Reseı benzıniniń tonnasy 320 dollardan 515 dollarǵa deıin qymbattaǵan.
«Jalpy, qazirdiń ózinde Reseıde salyqtyq oraǵytý júrgizilip jatyr. Olar benzın men dızel otynyna eksporttyq baj salyǵyn azaıtýda. Eksporttyq baj salyǵy bizge emes basqa memleketterge tómendetilýde. Sondyqtan Qazaqstanǵa jiberiletin benzınniń tıimdiligi olar úshin tómendeı túsýde. Menińshe, baǵa turaqty bolý kerek. Qazirdiń ózinde benzınniń 1 tonnasynyń baǵasy 515 dollar bolsa teńgege shaqqanda 165 myń teń bolady. Sonda bir lıtri Reseımen shekarada 123 teńgeden aınalady. Astanaǵa jetkizgenge deıin ol 5,1 teńgege qymbattaıdy. Oǵan janar-jaǵarmaı quıý stansalarynyń shyǵyndary esebinen taǵy 12-15 teńge qosylady. Jalpy, janar-jaǵarmaı quıý stansalary Reseı bezıniniń (AI-92) lıtrin 140-143 teńgeden sata alady. Árıne, Qazaqstan benzınin tómen baǵamen satýǵa bolady. Alaıda onda Reseı benzınin eshkim ákelmeıdi», - dedi Bozymbaev.
