Bozymbaev AES salýǵa qatysty máselege pikir bildirdi
NUR-SULTAN. QazAqparat - QR Energetıka mınıstri Qanat Bozymbaev reseılik taraptyń Qazaqstanda atom elektr stansasyn salý usynysyna qatysty pikir bildirdi, dep habarlaıdy QazAqparat tilshisi.
«El Prezıdenti Qasym-Jomart Toqaevtyń Máskeýge sapary barysynda reseılik taraptan Qazaqstanda atom elektr stansasyn salý múmkinshiligine qatysty usynys aıtyldy. Qazaqstanda stansa salý múmkindigine qatysty jumystar sońǵy 7-8 jylda júrgizilip kele jatqandyǵyn atap ótkim keledi. Búgingi kúni tehnıkalyq-ekonomıkalyq negizdeme bóliginiń ázirlengen kezeńde turmyz. Oǵan sáıkes 5 eldiń beıindi kompanııasyna ózderiniń usynystaryn bildirýi úshin hat joldandy. Olar: AQSh, Frantsııa, Koreıa, Qytaı jáne Reseı. Bul olardyń tehnologııalyq, kommertsııalyq jáne ekonomıkalyq parametrler boıynsha ózderiniń tehnıkalyq-ekonomıkalyq usynystaryn berýi úshin jasaldy. «Rosatom» da osyndaı usynys aldy»,- dedi mınıstr Úkimet otyrysynan keıin BAQ ókilderine bergen suhbatynda.
Osy oraıda Qanat Bozymbaev búgingi kúni elimizdiń aýmaǵynda atom elektr stansasyn salýǵa qatysty naqty sheshimniń áli qabyldanbaǵanyn aıtty.
«Biz áli de bul máseleni zerdeleý kezeńinde turmyz. Buǵan qosa ózge de jobalarmen jumys istep jatyrmyz. Shymkentte iri gaz-bý qurylǵysyn salý, Almatyda JES-2-ni gazǵa aýystyrý arqyly jańǵyrtý jáne elektr energııasyn óndirý qýatyn arttyrý, sonymen qatar birneshe sý elektr stansasyn salý kózdelýde. Sondyqtan munyń barlyǵyn birge qamtyp qaraý qajet. Taǵy da aıtamyn, eshqandaı sheshim joq», - dedi mınıstr.
Sondaı-aq ol boljamǵa sáıkes, 2030 jylǵa qaraı Qazaqstanda elektr energııasynyń tapshylyǵy oryn alýy múmkin ekendigin ashyq aıtty.
«Sebebi jyl saıyn elektr energııasyn tutyný artyp keledi. Sondyqtan qalaı bolǵanda da 2030 jylǵa qaraı jańa qýat kózin salý qajet. Eger Úkimet atom elektr stansasyn salý týrashy sheshim qabyldaıtyn bolsa, onda ol ashyq, el halqymen qoǵamdyq tyńdaýlar ótkiý arqyly keńesilgennen keıin qabyldanady», - dedi Q.Bozymbaev.
