«Bozoq» ulttyq parkiniń qurylysy bastaldy
Saltanatty shara aıasynda «Ýaqyt kapsýlasyna» estelik jazba qaldyryldy, jıynǵa tarıhshylar, arheologtar, qoǵam qaıratkerleri jáne qazba jumystaryn meńgerýge nıetti jas mamandar qatysty.
«Bozoq» ulttyq parki Astananyń týrıstik brendi ári mańdaıaldy sımvoly, elorda turǵyndary men qonaqtarynyń mádenı demalys ornyna aınalady, ishki jáne halyqaralyq týrızmniń ósýin qamtamasyz etedi.
«Bozoqtyń ejelgi qalashyǵy bizdiń halqymyz úshin úlken tarıhı jáne qasıetti qundylyqqa ıe. Bul jerde ulttyq saıabaq qurýdaǵy maqsat – tarıhı-mádenı muranyń baı qabatyn saqtaý jáne onymen úndes bolý, ony qalyń jurtqa kórsetip, tanymal etý. Bolashaqta bul aýmaq Uly dala tarıhyn beıneleıtin keshendi arheologııalyq saıabaqqa, elordamyzdyń turǵyndaryn ǵana emes, sonymen qatar Qazaqstan men álemniń túpkir-túpkirinen kelgen týrısterdi tartatyn ortalyqqa aınalady», – dedi Mádenıet jáne sport mınıstri Dáýren Abaev.
Joba qurylysy ǵalymdardyń qadaǵalaýymen 2025 jylǵa deıin jalǵasady. Ulttyq park qalanatyn orynda mamandar 20 jyl boıy zertteý jumystaryn júrgizgen.
«Biz búgin Qazaqstannyń qazirgi astanasynda ejelgi ýaqytta adamdar ómir súrgenin ǵylymı negizde aıta alamyz. Bul týraly 1998 jyly Bozoq qalashyǵyn ashqan esimi álemge tanymal arheolog Kemel Aqyshevtiń ǵylymı tujyrymdamalarynyń arqasynda bilip otyrmyz, ejelgi shahardyń qırandylary Buzyqty kóliniń shyǵys jaǵalaýynan tabylǵan. Osy 20 jyl ishinde ǵalymdar bul aımaqqa qazba jáne zertteý jumystaryn júrgizip, aýqymdy ister atqardy. Munda tabylǵan árbir jádiger osy aýmaqtyń baı mádenıeti bar bolǵanyn dáleldeıdi», – dedi «Bozoq» memlekettik tarıhı-mádenı mýzeı-qoryǵynyń dırektory Sáýle Býrbaeva.
Foto : gov.kz
