«Bozoq» qalashyǵy: qoryq-mýzeıdi salý jumysy qalaı júrip jatyr

ASTANA. KAZINFORM – Elordadaǵy Ulttyq akademııalyq kitaphanada ótken ǵylymı-konferentsııada «Bozoq» mýzeı-qoryǵyn salý jumystarynyń qalaı júrip jatqany aıtyldy.

— Ejelgi «Bozoq» qalashyǵy 1999 jyldan 2015 jylǵa deıin qazylyp boldy. Endi ony konservatsııaǵa salyp qoıdyq, endi ol qazylmaıdy. Qazirgi tańda qoryq-mýzeı aýmaǵy 412 gektar jer, ol tolyǵymen qorshaldy. Ońtústik jáne soltústik portaly salynyp boldy. Bıyl vızıt-ortalyǵynyń qurylysy bastalǵaly tur. Qazirgi tańda sonyń qujattary jóndelip jatyr. Ol ortaǵasyrlyq qala úlgisinde salynady, - dedi «Bozoq» mýzeı-qoryǵynyń eskertkishterdi saqtaý bóliminiń jetekshisi Janbolat Qazanbaev.

«Bozoq» mýzeı-qoryǵy dırektorynyń orynbasary Álisher Bespalınovtyń aıtýynsha, ońtústik portaldyń uzyndyǵy 140, soltústik portaldyń uzyndyǵy 120 metr. Sondaı-aq uzyndyǵy 8,7 km qorshaý salynǵan. 

— Qurylys jumystarynyń birinshi kezeńin júzege asyrýǵa 6,5 mlrd teńge bólindi. Oǵan ınjenerlik kommýnıkatsııalar tartý, asfalt-beton tóseý, abattandyrý, portaldardy jáne qorshaý salý kiredi. Birinshi kezeń 2027 jyly aıaqtaý josparlanǵan. Al jalpy joba qurylysy 2029 jyly aıaqtalady, - dedi ol. 

Spıkerdiń aıtýynsha, ótken jyldyń qorytyndysy boıynsha 150 myńdaı adam «Bozoqty» onlaın jáne offlaın formatta tamashalaǵan. 

Eske salsaq, «Bozoq» ulttyq parkiniń qurylysy 2022 jyly bastaldy.

Al «Bozoq» memlekettik tarıhı-mádenı qoryǵyn damytý boıynsha birlesken josparǵa 2019 jyly qol qoıylǵan bolatyn.