Bozymbaev úsh oblystyń ákimimen óńirlerdi damytýdyń jańa tásilderin talqylady
ASTANA. KAZINFORM – Premer-mınıstrdiń orynbasary Qanat Bozymbaev jumys sapary aıasynda Semeı qalasynda Abaı, Shyǵys Qazaqstan jáne Pavlodar oblystarynyń áleýmettik-ekonomıkalyq damýy boıynsha keńes ótkizdi.
QR Úkimeti baspasóz qyzmetiniń málimetinshe, atalǵan jıynǵa óńir ákimderi, salalyq mınıstrlikter men Amanat partııasynyń ókilderi qatysyp, óńirlik saıasatty iske asyrýdyń jańa tásilderi jan-jaqty qarastyryldy.
Ortalyq tarapynan áleýmettik jáne basqa ınfraqurylymdy basym túrde qarjylandyrý neǵurlym damyǵan oblystarmen alshaqtyqty qysqartý úshin artta qalǵan óńirlerge baǵyttalatyny atap ótildi. Sondaı-aq bıznesti damytý úshin «Aýyl amanaty» baǵdarlamasy jelisi boıynsha qarjylandyrý óńirlerge qosylǵan qun tizbegine qatysatyn jáne qajetti shıkizat áleýeti men ótkizý naryqtary bar naqty jobalarǵa beriledi.
2028 jylǵa deıin atalǵan úsh óńirde agroónerkásip kesheni, taý-ken metallýrgııa salasy, týrızm jáne qaıta óńdeý baǵytynda 6,5 trln teńgege 102 ınvestıtsııalyq jobany iske asyrý josparlanyp otyr. Qaıta óńdeý óndiristerin, ShOB klasterlerin jáne Katonqaraǵaı, Baıanaýyl, Zaısan, Alakól, Shúlbi sý qoımasy sııaqty týrıstik aımaqtardy damytý qajettigi atap ótildi. Sonymen qatar transshekaralyq aǵyndardy eskere otyryp, Reseı men Qytaı naryǵyna shyǵý múmkindigi bar óńirlerdiń kólik-logıstıkalyq áleýetin paıdalaný mańyzdy.
Aýyldar men monoqalalardy qoldaý máselesine erekshe nazar aýdaryldy. «Aýyl amanaty» jobasy aıasynda Amanat partııasy men óńir ákimdikteri aýyldardy saralap, olardyń mamandanýyn aıqyndady. Vıtse-premer aýyl sharýashylyq kooperatıvterin qurýdy jáne skrınıng nátıjesine saı aýyldarda shaǵyn ónerkásiptik aımaqtar qalyptastyrýdy tapsyrdy.
Keńes barysynda Abaı oblysynyń ákimi Berik Ýálı, Pavlodar oblysynyń ákimi Asaıyn Baıhanov jáne Shyǵys Qazaqstan oblysynyń ákimi Nurymbet Saqtaǵanov esep berdi. Otyrys qorytyndysy boıynsha óńir ákimdikteri men salalyq mınıstrlikterge birqatar tapsyrma berildi.
Eske sala keteıik, buǵan deıin Oljas Bektenovtiń AQSh, Eýropalyq Odaq pen Kanada elshilikteriniń, Amerıka Saýda palatasy basshylyǵynyń, Johnson&Johnson, Pfizer, AstraZeneca, Kazanada LLP, La Roche sııaqty jáne basqa da halyqaralyq kompanııalardyń óńirlik dırektorlarymen keńes otyrys ótkizgenin jazǵan edik.