Bozymbaev sý salasyndaǵy memlekettik saıasattyń negizgi baǵyttaryn atady

ASTANA. KAZINFORM — Astana ekonomıkalyq forýmy aıasynda «Sý qaýipsizdigi — Ortalyq Azııanyń turaqty bolashaǵyna arnalǵan basty ınvestıtsııa» taqyrybynda sessııa ótti, dep habarlaıdy Úkimettiń baspasóz qyzmeti.

Sessııa barysynda Qazaqstan Respýblıkasy Premer-Mınıstriniń orynbasary Qanat Bozymbaev baıandama jasady.

Óz sózinde ol forýmdy uıymdastyrýǵa belsendi qoldaý kórsetkeni jáne Qazaqstannyń klımattyq syn-qaterlerge qarsy kúres jónindegi kúsh-jigerin qoldaǵany úshin BUU-nyń Azyq-túlik jáne aýyl sharýashylyǵy uıymyna alǵysyn bildirdi.

Qanat Bozymbaevtyń aıtýynsha, klımattyń jyldam ózgerýi jaǵdaıynda Ortalyq Azııa elderi sý resýrstary salasyndaǵy ósip kele jatqan máselelerge tap bolýda — bul ózen sýynyń azaıýy, qurǵaqshylyqtyń jıileýi, sý tasqyndarynyń artýy. Osyǵan baılanysty sýdy tıimdi paıdalaný máselesi memlekettik saıasattyń basty basymdyqtarynyń birine aınalýda.

Sessııada Vıtse-premer sý salasyndaǵy memlekettik saıasattyń negizgi baǵyttaryn atap ótti:

Birinshiden. Sý sharýashylyǵy ınfraqurylymyn damytý jáne jańǵyrtý. 42 jańa sý qoımasyn salý jáne 30 qoldanystaǵy sý qoımasyn qaıta qurý, sondaı-aq 14 myń shaqyrymnan astam sýarý kanaldaryn jańǵyrtý josparlanǵan. Bul sýarmaly jerlerdiń kólemin ulǵaıtýǵa, tótenshe jaǵdaılarǵa tótep berýge jáne ekonomıkanyń túrli salalaryn turaqty sýmen qamtamasyz etýge múmkindik beredi.

Ekinshiden. Sý resýrstaryn paıdalaný tıimdiligin arttyrý. Qazaqstan aýyl sharýashylyǵynda sýdy únemdeý tehnologııalaryn engizý boıynsha belsendi jumys júrgizýde. Atap aıtqanda, sýarý júıelerin qurý men tamshylatyp jáne jańbyrlatyp sýarý jabdyqtaryn satyp alýǵa arnalǵan shyǵyndardy sýbsıdııalaý úlesi 50%-dan 80%-ǵa deıin artty.

Úshinshiden. Sý sektoryn tsıfrlandyrý. Hydro.gov.kz atty biryńǵaı sý kadastry qalyptastyrylatyn tsıfrlyq platforma qurylýda. 3,5 myń shaqyrymnan astam sýarý kanaldaryn tsıfrlandyrý jáne sý esebin júrgizý júıesin avtomattandyrý jumystary júrgizilýde.

Tórtinshiden. Sý resýrstary salasyndaǵy zańnamany jetildirý. Qazirgi zamanǵy ekologııalyq jáne tehnologııalyq talaptardy eskere otyryp, sý resýrstary salasyndaǵy zańnama jańartylýda.

Besinshiden. Halyqaralyq yntymaqtastyqty nyǵaıtý. Qazaqstan transshekaralyq sý resýrstaryn utymdy paıdalaný máseleleri boıynsha kórshiles memlekettermen belsendi yntymaqtastyq ornatýda. Úkimetaralyq birqatar kelisimderge qol qoıylyp, gıdrologııalyq jáne gıdrohımııalyq aqparat almasý júzege asyrylyp, sý paıdalaný rejımderi kelisilip, tótenshe jaǵdaılar kezinde birlesken is-qımyldar úılestirilýde.

Araldy qutqarý halyqaralyq qory (AQHQ) aıasyndaǵy yntymaqtastyqqa erekshe nazar aýdarylýda. Qazaqstan Qor sheńberindegi mindettemelerge árdaıym berik ekenin kórsetip keledi jáne onyń uıymdyq qurylymy men sharttyq-quqyqtyq bazasyn odan ári jetildirýdi qoldaıdy.

— Biz AQHQ-ny reformalaý boıynsha aldaǵy ýaǵdalastyqtardan zor úmit kútemiz. Bul mańyzdy óńirlik uıymnyń barlyq Ortalyq Azııa elderiniń múddelerin eskere otyryp, tıimdiligin arttyrýǵa baǵyttalǵan, — dep atap ótti Qanat Bozymbaev.

Sóz sońynda Vıtse-premer sý máseleleri boıynsha sheshim qabyldaýdy jedeldetý jáne óńir elderiniń klımattyq jáne tabıǵı qaterlerge tótep berý qabiletin arttyrý qajettigin atap ótti.

Buǵan deıin Astana forýmyna jumsalǵan 4,5 mlrd teńge keminde 4,5 mlrd dollar bop qaıtýy múmkin ekeni aıtyldy.