Bozymbaev Shymkenttegi energojeliler men kommýnaldyq ınfraqurylymdy jańǵyrtý barysyn baǵalady
ASTANA. KAZINFORM – Premer-mınıstrdiń orynbasary Qanat Bozymbaev Shymkenttegi energııamen qamtamasyz etetin strategııalyq nysandardy aralap, qalanyń aktıvimen «Energetıka jáne kommýnaldyq sektorlardy jańǵyrtý» Ulttyq josparyn iske asyrý boıynsha keńes ótkizdi. Bul týraly Úkimettiń baspasóz qyzmeti habarlady.
Ákimdiktiń málimeti boıynsha, búginde 29 km jylý jelisi jáne 330 km elektr jelisi rekonstrýktsııalandy. Qazandyqtar jóndelip, 50 elektr transformatorlary aýystyryldy.
Keńes barysynda tek jelilerdiń ǵana emes, elektr podstantsııalarynyń qurylysy da Ulttyq jobaǵa engizilýi usynylyp, maquldandy. Osylaısha, Shymkentte 400 km-den astam eskirgen elektr jelilerin aýystyrý jáne qýaty 125 MVt bolatyn jańa «Qyzylsý» elektr podstantsııasynyń qurylysy qarastyrylyp jatyr.
Vıtse-premer ákimshilik-iskerlik ortalyqtaǵy qazandyq jumysyn tekserdi. Qazandyq qalanyń 10%-yn jylýmen jáne ystyq sýmen qamtamasyz etip otyr. Jergilikti bılik 2027 jylǵa deıin qoldanystaǵy 5 qazandyqqa qosa jalpy qýaty 120 Gkal bolatyn 4 qazandyq ornatýdy josparlap otyr, bul qalaǵa jylý berý kólemin 20%-ǵa arttyrady.
Budan bólek, Qanat Bozymbaev qalany 70% jylý jáne 30% elektr energııamen qamtamasyz etetin óńirdegi jalǵyz TETs-3 stantsııasyn aralady. TETs-3-tiń qalaǵa deıingi jylý jelisiniń jalpy uzyndyǵy 60 km-ge jýyq, al onyń 90%-y tozǵan. Osyǵan baılanysty, Ulttyq jobaǵa osy jylý jelileriniń 17 shaqyrymyn rekonstrýktsııalaýǵa qosý týraly sheshim qabyldandy.
Sonymen qatar vıtse-premer qýaty 40 MVt bolatyn «Dendropark» elektr podstantsııasynyń jumysymen tanysty. Ákimdiktiń málimetinshe, joba 2024 jyly «Tarıfti ınvestıtsııaǵa aıyrbastaý» ınvestıtsııalyq baǵdarlamasy aıasynda bıýdjettik qarajatsyz iske asyryldy. Elektr podstantsııasy jańa turǵyn aýdandardy sapaly elektr energııasymen qamtamasyz etýge múmkindik beredi. Aıta ketý kerek, Shymkentte Ulttyq joba «Dendropark» elektr podstantsııasynyń úlgisine saı bıýdjettik qarajatsyz júzege asady.
Jumys sapary barysynda Qanat Bozymbaev Shymkent qalasynyń TJD «Kóktem-2025» respýblıkalyq komandalyq-shtabtyq oqý-jattyǵýymen tanysyp, Badam ózenindegi jaǵalaýdy qorǵaý bógetterin tekserdi. Alty eldi mekennen ótetin ózende arnany túzetý boıynsha ınjenerlik qurylys jumystary júrgizilgen.