Bozymbaev óńirlerdegi kommýnaldyq jobalardy jedeldetýdi tapsyrdy
ASTANA. KAZINFORM — QR Premer-mınıstriniń orynbasary Qanat Bozymbaevtyń tóraǵalyǵymen «Energetıkalyq jáne kommýnaldyq sektorlardy jańǵyrtý» (EKSJ) ulttyq jobasyn júzege asyrý jónindegi Jobalyq keńseniń otyrysy ótti.
Infraqurylymdy jańartý barysy, jekelegen óńirler boıynsha jumystardy jedeldetý úshin sharalar qabyldaý jáne 2027 jylǵa arnalǵan jobalardy daıyndaý máseleleri qaraldy.
Ulttyq ekonomıka mınıstrliginiń málimetinshe, toǵyz óńirde 22 nysandaǵy jumystar aıaqtaldy. 145 joba boıynsha qurylys jumystary men jabdyqtardy satyp alý júrgizilýde. Sonymen qatar kelesi qurylys maýsymyna daıyndyq júrip jatyr. 180 joba boıynsha sharttar jasalyp qoıǵan.
— Qazirgi ýaqytta kommýnaldyq ınfraqurylymǵa arnalǵan jobalar men ınvestıtsııalardyń jalpy pýly tańǵaldyrady. Táýelsizdigimizdiń búkil tarıhynda mundaı bolǵan emes. Osy ınvestıtsııalardyń barlyǵyn ýaqtyly ıgerip, naqty nátıjelerdi kórsetý qajet, — dedi Qanat Bozymbaev.
Otyrys barysynda ulttyq jobany júzege asyrý qarqynyn jedeldetý úshin jergilikti jerlerde vedomstvoaralyq ózara is-qımyldyń tıimdiligin arttyrýdyń mańyzdylyǵy atap ótildi. Ákimdikterdiń, kommýnaldyq kásiporyndardyń jáne Tabıǵı monopolııalardy retteý komıtetiniń aýmaqtyq departamentteriniń tyǵyz jumys isteý qajettiligine erekshe nazar aýdaryldy.
Túrkistan oblysynda málimdelgen 13 jobanyń 11-i boıynsha shart jasalǵan, al qurylys jumystary beseýinde ǵana bastalǵan. Aqtóbe oblysynda 17 jobanyń segizi boıynsha shartqa qol qoıylǵan, jumystar tórt jobada júrgizilýde. Bul rette óńirdegi jylý jelileriniń tozýy — 55%-dy, al elektr jelileriniń tozýy 76%-dy quraıdy. Jambyl oblysynda 20 nysannyń beseýinde qurylys jumystary bastaldy.
Qanat Bozymbaev jobalyq keńseniń barlyq sheshimderiniń ýaqtyly oryndalýyn qamtamasyz etýdi tapsyrdy: úsh óńirge 20 qarashaǵa deıin osy jyldyń jobalary boıynsha sharttar jasasýdy aıaqtaý tapsyryldy.
Vıtse-premer Ulttyq jobanyń tıimdiligi naqty nátıjeler boıynsha: jańartylǵan jelilerdiń uzyndyǵy, olardyń tozýy men apat qaýpiniń tómendeýi sekildi kórsetkishterdi eskere otyryp baǵalanýy tıis ekenin atap ótti. Ulttyq ekonomıka mınıstrligine jobalardyń júzege asyrylý barysyna kúndelikti baqylaý ornatý tapsyryldy.
2027 jylǵy qurylys maýsymyna daıyndyq barysyna erekshe nazar aýdaryldy. Ákimdikterge 1 jeltoqsanǵa deıin konkýrstyq rásimderdi aıaqtaý, al jyl sońyna deıin sharttardyń jasalýyn jáne qarjylandyrý máseleleriniń sheshilýin qamtamasyz etý tapsyryldy.
Sonymen qatar otandyq óndirýshilerdi qoldaý, kommýnaldyq salany tsıfrlandyrý jáne tazartý qurylystaryn jańǵyrtý máseleleri qaraldy. Ulttyq joba aıasynda 3,5 mlrd teńgeden astam somaǵa qazaqstandyq ónimdi jetkizýge 54 shart jasalyp qoıdy.
Otyrys qorytyndysy boıynsha Qanat Bozymbaev jaýapty uıymdar arasyndaǵy úılestirýdi kúsheıtýdi, belgilengen merzimderdiń saqtalýyn qamtamasyz etýdi jáne óńirlerde Ulttyq jobanyń júzege asyrylý tıimdiligin arttyrýdy tapsyrdy.
