Bozymbaev óńirler arasyndaǵy ınfraqurylymdyq alshaqtyqty qysqartatyn sharalardy atady

ASTANA. KAZINFORM – 2028 jyly óńirlerdi ınfraqurylymmen qamtamasyz etý 69,2 paıyzǵa jetedi. Bul týraly Aýyl ákimderiniń dıalog-platformasynda Premer-mınıstrdiń orynbasary Qanat Bozymbaev aıtty.

- Memlekettik saıasattyń basym baǵyttarynyń biri - óńirlerdiń teńgerimdi áleýmettik-ekonomıkalyq damýyn qamtamasyz etý. Úkimet Óńirlik damýdyń 5 jyldyq tujyrymdamasyn qabyldady. Bul qujat óńiraralyq dısproportsııalardy qysqartýdyń jáne óńirlerdiń áleýetin ashýdyń negizgi tásilderin belgileıdi. Tujyrymdama aıasynda 5 makroóńirlerge erekshe nazar aýdarylyp jatyr. Olardyń geografııalyq ornalasýy, ekonomıkalyq mamandanýy jáne naryqtyq baılanystaryna sáıkes damytýdyń negizgi baǵyttary aıqyndaldy, - dedi Qanat Bozymbaev.

Onyń aıtýynsha, ınfraqurylymdyq obektilerge qol jetkizýdegi óńirlik dısproportsııalardy qysqartý úshin jańa Óńirlik standarttar júıesi qabyldanyp, onyń talaptary Bıýdjet kodeksine engizildi.

- Atap aıtqanda, neǵurlym artta qalǵan óńirlerge basym túrde qoldaý kórsetiledi. Mysaly, búgingi tańda joǵary kórsetkishterge ıe óńirler men keıbir óńirler arasyndaǵy ınfraqurylymmen qamtamasyz etý deńgeıindegi alshaqtyq 1,5 ese boldy. Sáıkesinshe jalpy sıpattaǵy damý transfertteri keıin qalǵan óńirlerdiń múmkindikterin eskere otyryp qalyptastyryldy. Nátıjesinde 2028 jyly qorytyndysy boıynsha ınfraqurylymmen qamtamasyz etý deńgeıi 5,1 paıyzǵa ósip, 69,2 paıyzǵa jetedi. Jalpy, aıtylǵan sharalar óńirler arasyndaǵy ınfraqurylymdyq alshaqtyqty qysqartýǵa múmkindik beredi, - dedi Úkimet basshysynyń orynbasary.

Astanada aýyl ákimderiniń dıalog-platformasy ótip jatqanyn jazǵan bolatynbyz.