Bozymbaev mınıstrge Qytaı men Reseıden keletin ózender máselesin birjola sheshýdi tapsyrdy

ASTANA. KAZINFORM — Premer-mınıstrdiń orynbasary Qanat Bozymbaev sý resýrstary jáne ırrıgatsııa mınıstrliginiń alqa májilisinde vedomstvo basshysy Nurjan Nurjigitovke bıyl sý dıplomatııasyn jandandyrýǵa erekshe kóńil bólýdi tapsyrdy.

Onyń aıtýynsha, bul shara Reseı men Qytaıdan bastaý alatyn ózenderdiń jyldar boıy sheshimin tappaı kele jatqan máselesin retteý úshin qajet.

— Reseı baǵytynda ózara atqarylyp jatqan jumystarǵa qaramastan, Jaıyq, Ertis sııaqty iri ózenderdiń basseınderinde zertteýler júrgizý yntymaqtastyǵynyń jol kartasyn ári qaraı da iske asyrýǵa erekshe nazar aýdarý kerek. Bıyl aqpan aıynan bastap eki tarap ta tasqynǵa daıyndyqty belsendi ári, bir-birin qulaqtandyra otyryp júrgizip jatqanyn atap ótý qajet. Qazaqstan Reseı aýmaǵyndaǵy sý qoımalarynyń jumys rejımin aldyn ala túzetip otyrý úshin jedel jumysty jalǵastyrýdy tapsyramyn, — dedi vıtse-premer.

Qanat Bozymbaevtyń paıymdaýynsha, Qytaı baǵytynda da osyndaı jyldar boıy sheshilmeı kele jatqan máseleler bar.

— Bir sózben aıtqanda, bıyl mınıstrlikke sý dıplomatııasyn jandandyrý kerek, — dedi Premer-mınıstrdiń orynbasary.

Mınıstr Nurjan Nurjigitovtiń aıtýynsha, vedomstvo quramynda Qytaı men Reseıden keletin transshekaralyq ózender boıynsha kelissóz júrgize alatyn 8 sý dıplomaty bar.