Bozymbaev: Mańǵystaýda qaıǵyly oqıǵaǵa sebep bolǵan árbir laýazymdy tulǵa zań aldynda jaýap beredi
ASTANA. KAZINFORM — Premer-mınıstrdiń orynbasary Qanat Bozymbaev Mańǵystaý oblysyndaǵy qaıǵyly oqıǵaǵa qatysty málimdeme jasady.
— Búgin elimiz aýyr qaıǵyǵa ushyrady. Mańǵystaý oblysyndaǵy qaıǵyly oqıǵanyń saldarynan 12 áskerı qyzmetshi qaza taýyp, úsheýi qutqaryldy. Áli tabylmaǵan eki áskerı qyzmetshini izdestirý jumystary júrgizilip jatyr. Memleket basshysy Qasym-Jomart Kemeluly Toqaev qaza tapqan sarbazdar men ofıtserlerdiń otbasylaryna, týǵan-týystary men jaqyndaryna kóńil aıtty. Prezıdent jáne búkil Qazaqstan halqy sizderdiń orny tolmas qaıǵylaryńyzǵa ortaq, — dedi ol.
Qanat Bozymbaevtyń sózinshe, oqıǵanyń barlyq mán-jaıyn anyqtaý úshin Prezıdenttiń tapsyrmasy boıynsha Úkimet meniń jetekshiligimmen arnaıy komıssııa qurdy. Osy jaǵdaıǵa baılanysty quzyrly organdar qylmystyq ister qozǵady.
— Tergeý barynsha muqııat, jan-jaqty ári qysqa merzimde júrgiziledi. Qaıǵyly oqıǵaǵa sebep bolǵan árbir laýazymdy tulǵa zań aldynda eń qatań túrde jaýap beredi. Memleket qaza tapqandardyń otbasylaryn jalǵyz qaldyrmaıdy. Qaza tapqan árbir áskerı qyzmetshiniń otbasyna qomaqty materıaldyq kómek berilip, sondaı-aq barlyq qajetti qoldaý kórsetiledi. Tergeý barysy men otbasylarǵa kómek kórsetý jumysyn jeke baqylaýymda ustaımyn, — dedi Premer-mınıstrdiń orynbasary.
Eske salaıyq, 2026 jylǵy 24 qyrkúıekte Kaspııdegi áskerı oqý-jattyǵý kezinde 9 áskerı qyzmetshi qaza tapqanyn habarlaǵanbyz. Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy.
Keıinnen Kaspııde qaza bolǵan áskerı qyzmetshilerdiń sany 12-ge jetip, ekeýi izdestirilip jatqany habarlandy.
Qorǵanys mınıstrligi oqý-jattyǵý kezinde qaza tapqan áskerı qyzmetshilerdiń tizimin jarııalady.
Áskerı qyzmetshilerdiń qaza bolý faktisi boıynsha qylmystyq is qozǵalyp, tergelip jatqanyn jazdyq.
Budan bólek, Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy. Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi.
Premer-mınıstrdiń orynbasary Qanat Bozymbaev bastaǵan komıssııa Mańǵystaý oblysyna baryp, áli tabylmaǵan áskerı qyzmetshilerdi úzdiksiz izdestirýdi tapsyrdy.
Sonymen qatar, Prezıdent Qasym-Jomart Toqaev Mańǵystaý oblysynda áskerı oqý-jattyǵý kezindegi qaıǵyly oqıǵa saldarynan qaza tapqan áskerı qyzmetshilerdiń týǵan-týystaryna kóńil aıtty.
Áskerılerdiń qazasynan keıin Aqtaýda úsh kúnge josparlanǵan merekelik sharalar ótpeıtini aıtyldy.
