Bozymbaev Mańǵystaýda akvasharýashylyq pen qubyr ónerkásibin damytý jóninde tapsyrma berdi
ASTANA. KAZINFORM – Premer-mınıstrdiń orynbasary Qanat Bozymbaev Mańǵystaý oblysynyń áleýmettik-ekonomıkalyq damý máseleleri jónindegi Jobalyq keńseniń alǵashqy otyrysyn ótkizdi.
Oǵan óńir ákimdiginiń, sondaı-aq ulttyq ekonomıka, qarjy, syrtqy ister, ishki ister, ónerkásip jáne qurylys, kólik, aýyl sharýashylyǵy, saýda jáne ıntegratsııa, eńbek jáne halyqty áleýmettik qorǵaý mınıstrlikteriniń basshylyǵy qatysty.
Qatysýshylar jumystyń basym baǵyttaryn aıqyndady. Olar – eńbek kóshi-qonyn retteý, jumyssyzdyqty azaıtý, otandyq bıznesti qoldaý jáne ınvestorlar úshin qolaıly jaǵdaı qalyptastyrý.
«Aqtaý teńiz porty» arnaıy ekonomıkalyq aımaǵyndaǵy ınfraqurylymdy damytý máseleleri talqylandy.
Akvasharýashylyqty damytý áleýetine erekshe nazar aýdaryldy. Salany keńinen damytý maqsatynda jobalardy nesıeleý tetikterine, sonyń ishinde mamandandyrylǵan teńiz tehnıkasyn satyp alýǵa qatysty ózgerister engizý usynyldy.
Sondaı-aq qubyr ónerkásibi salasyndaǵy óndirýshilerdiń máselelerin sheshý jáne Jańaózen qalasyndaǵy óndiristi lokalızatsııalaý talaptaryn qaıta qaraý jónindegi sharalar talqylandy.
Jobalyq keńse otyrysynda óńirdegi jumyspen qamtý jaǵdaıy óz aldyna bólek qarastyryldy. Kóshi-qonnyń oń saldosymen qatar, sońǵy úsh jylda jumyssyzdyq deńgeıiniń ósýi tirkelip otyr. Osyǵan baılanysty oblys ákimdigi óńirge kelip jatqan halyqty elimizdiń eńbek kúshi tapshy aımaqtaryna qonystandyrýǵa baǵyttalǵan óńiraralyq ınvestıtsııalyq jobany ázirledi.
Vıtse-premer Jobalyq keńse múshelerine jumys toptaryn quryp, qosymsha taldaý júrgizip, kóterilgen máselelerdi jedel sheshý boıynsha usynystar ázirleýdi tapsyrdy.
Budan buryn habarlaǵanymyzdaı, Bektenov aýyldaǵy turǵyn úı qurylysynda MJÁ tetiginiń qoldanylmaý sebebin atady.
