Bozymbaev kommýnaldyq jobalarda otandyq ónim úlesin arttyrýdy tapsyrdy

Jıynda «Energetıkalyq jáne kommýnaldyq sektorlardy jańǵyrtý» ulttyq jobasynyń qalaı júzege asyrylyp jatqany, kelesi jylǵy jobalardyń daıyndyǵy, sondaı-aq qarjylandyrý, tsıfrlandyrý jáne otandyq óndirýshilerdi jumyspen qamtý máseleleri talqylandy.

Búgingi tańda alǵashqy 14 nysanda jumystar tolyq aıaqtaldy. Jalpy ulttyq joba aıasynda 839 mıllıard teńge bolatyn 347 joba daıyndalǵan. Onyń 220-sy boıynsha merdiger uıymdar anyqtalsa, 126 mıllıard teńgeniń 77 jobasynda qurylys jumystary men qural-jabdyq satyp alý bastalyp ketti. Taǵy 29 joba qazirgi ýaqytta konkýrs kezeńinde tur.

Alǵashqy aıaqtalǵan nysandar jeti óńirde ornalasqan. Olarǵa salynǵan ınvestıtsııanyń jalpy kólemi 27,3 mıllıard teńgeni qurady, al konkýrs nátıjesinde 975 mıllıon teńgege jýyq qarjy únemdeldi. Jobalardyń jeteýi Pavlodar oblysynda, ekeýi Batys Qazaqstan oblysynda júzege asty. Sonymen qatar Astana, Shymkent qalalarynda, Qaraǵandy, Soltústik Qazaqstan, Túrkistan oblystarynda jumystar aıaqtaldy. Qazir bul nysandardy paıdalanýǵa berý úshin qujattar rásimdelip jatyr.

Qazirdiń ózinde birneshe óńirde bul jumys nátıjesin kórsetti. Jetisý oblysynda 31 mıllıard teńgege 24 shart jasalyp, jumys bastaldy. Al Qaraǵandy oblysynda 88,1 mıllıard teńgeni quraıtyn 15 joba boıynsha kelisimsharttarǵa qol qoıyldy.

Degenmen 30 kásiporynǵa tıesili 67 joba boıynsha qurylys túrli sebepterge baılanysty áli bastalǵan joq. Jobalardy júzege asyrý qarqyny tómen óńirler retinde otyrysta Shymkent qalasy, Abaı, Ulytaý, Almaty, Atyraý jáne Túrkistan oblystary ataldy.

— Eger óńirde biliktilik nemese tájirıbe jetispese, ózara tájirıbe almasyńyzdar. Árbir jobaǵa erekshe kóńil bólip, týyndaǵan máselelerdi sol jerde sheshý úshin nysandardy baryp aralaý qajet, — dedi Qanat Bozymbaev.

2027 jylǵa josparlanǵan jobalardyń daıyndyǵyna da bólek nazar aýdaryldy. Búgingi tańda 300 mıllıard teńgeni quraıtyn 245 joba boıynsha qajetti kelisimder alynyp, konkýrs jumystary bastalyp ketti. Premer-mınıstrdiń orynbasary konkýrs pen qujattama sharalaryn kelesi qurylys maýsymyna sozbaı, jobalardy júzege asyrýǵa erte bastan tolyq daıyndaýdy tapsyrdy.

Otyrysta EKSJ Jobalyq keńsesiniń qatysýshylary budan bylaı jumystyń barysy týraly apta saıyn esep beretini aıtyldy. Al qazan aıyna deıin Ulttyq ekonomıka mınıstrligi ár óńir boıynsha tapsyrmalardyń qalaı oryndalyp jatqany týraly bólek taldaý usynýy tıis.

Qarjylandyrý jaǵynan kepildik retinde qoıatyn múlki jetkiliksiz, múmkindigi shekteýli shaǵyn jeke kommýnaldyq kásiporyndarǵa qarajat tartý joldary qaraldy. Qanat Bozymbaev mundaı jobalar úshin qarjy kózderin taýyp, qaryzyn kepildendirý tetikterin pysyqtaýdy tapsyrdy.

Taǵy bir basty baǵyt — kommýnaldyq ınfraqurylymdy esepteý quraldarymen qamtamasyz etý jáne salalyq málimetterdi bir júıege biriktirý. Vıtse-premer bul jumystyń Prezıdent júktegen jasandy ıntellektini damytý jáne tsıfrlandyrý mindetimen tikeleı baılanysty ekenin atap ótti.

— Esepteý quraldarymen qamtý — tek Ulttyq jobanyń sharýasy emes. Prezıdent aldymyzǵa jasandy ıntellektini engizý men tsıfrlandyrý boıynsha naqty mindet qoıyp otyr. Biz ınfraqurylymdy jańartyp, jelilerdi qaıta jóndep jatyrmyz, biraq sonymen qatar málimettermen de durys jumys isteýdi jolǵa qoıýǵa mindettimiz. Bastapqy málimettersiz, olardy jibermeı jáne taldamaı jasandy ıntellektini tolyqqandy engizý múmkin emes, — dedi Qanat Bozymbaev.

Talqylaý qorytyndysy boıynsha jaýapty memlekettik organdarǵa aqparattyq júıelerdiń ózara baılanys tetigin qurý, esepteý quraldaryna qoıylatyn talaptardy aıqyndaý jáne bul jumysty óńirler, kásiporyndar men salalar boıynsha júzege asyrý josparyn bekitý tapsyryldy.

Vıtse-premer konkýrs protsedýralarynyń sapasyna erekshe toqtaldy. Tabıǵı monopolııalardy retteý komıteti men «TKSh QazOrtalyǵy» AQ júrgizgen tekseris barysynda keıbir jobalardy júzege asyrýda zańbuzýshylyqtar anyqtaldy.

— EPC-merdigerlerdi anyqtaý úshin ótkiziletin konkýrs protsedýralarynyń sapasyna jeke toqtalǵym keledi. Shilde aıynan beri ýákiletti organǵa 300-ge jýyq shaǵym túsip, onyń 112-si qanaǵattandyryldy. Bul konkýrs qujattamasynyń nashar daıyndalǵanyn jáne tapsyrys berýshi taraptyń biliktiligi tómen ekenin kórsetedi. Eskertemin, konkýrstardy ótkizý kezinde zańsyz áreketter anyqtalsa, quqyq qorǵaý organdaryn tarta otyryp, bul máselemen jeke ózim aınalysamyn. Osyny tapsyrys berýshilerińizge jetkizińizder, — dedi Qanat Bozymbaev.

Ulttyq ekonomıka mınıstrligine ákimdiktermen birlesip, konkýrs protsedýralarynyń ótkizilýin baqylaýdy kúsheıtý jáne eger zańbuzýshylyqtar anyqtalsa, 2026 jyldyń 1 qazanyna deıin tabıǵı monopolııa sýbektileriniń basshylaryn ákimshilik jaýapkershilikke tartý máselesin pysyqtaý tapsyryldy.

Qanat Bozymbaev EKSJ jobalaryna otandyq óndirýshilerdiń qatysýyna erekshe toqtaldy. Onyń aıtýynsha, ınfraqurylymdy jańǵyrtýǵa bólinetin qomaqty qarjy ishki ekonomıkaǵa jumys istep, qazaqstandyq kásiporyndardy tapsyryspen qamtamasyz etýi tıis.

— Qazaqstandyq taýar óndirýshilerdi barynsha tapsyryspen qamtamasyz etý qajet. Bólingen qarjy Ulttyq jobany júzege asyrýǵa baǵyttalǵan, sondyqtan ol bizdiń ekonomıkamyzǵa jumys isteýi tıis. Qosylǵan qun Qazaqstanda qalýy kerek, — dedi Qanat Bozymbaev.

Ónerkásip jáne qurylys mınıstrligine múddeli memlekettik organdarmen birlesip, 15 qazanǵa deıin satyp alýlar men ofteık-kelisimsharttar boıynsha normatıvtik quqyqtyq aktilerge qajetti ózgerister engizý jáne otandyq óndirýshilermen ózara is-qımyldyń naqty tetikterin aıqyndaý tapsyryldy. 2027 jylǵy jobalardy qosa alǵanda, qolda bar barlyq joba Ulttyq jobanyń elektrondy platformasyna júktelýi tıis.

Ákimdikter men «TKSh QazOrtalyǵy» AQ-ǵa EKSJ ulttyq jobasy aıasynda jańǵyrtylatyn nysandarda otandyq ónimderdiń qoldanylýyn baqylaýdy kúsheıtý tapsyryldy.

Jınalysty qorytyndylaı kele, Qanat Bozymbaev jumystyń sapasyna qoıylatyn talaptardy tómendetpesten, jobalardy júzege asyrýdy jedeldetýdi talap etti.

— Jumys qarqynyn údetý kerek. Bıyl josparlanǵan kólemdi tolyq ıgerýimiz qajet. Sonymen qatar bári sapaly bolýy tıis. Sozbaqtaýǵa ýaqyt joq, — dep túıindedi Qanat Bozymbaev.