Kaspııdegi 9 áskerı qyzmetshiniń qazasy: úkimettik komıssııa quryldy
ASTANA. KAZINFORM — Mańǵystaý oblysynda áskerı qyzmetshilerdiń qaza bolý sebepterin tergep-tekserý jónindegi úkimettik komıssııa quryldy.
Úkimettiń baspasóz qyzmetiniń habarlaýynsha, Qazaqstan Respýblıkasy Premer-mınıstriniń ókimimen Mańǵystaý oblysynda áskerı oqý-jattyǵýlar ótkizý barysynda áskerı qyzmetshilerdiń qaza bolý sebepterin tergep-tekserý boıynsha úkimettik komıssııa quryldy.
— Komıssııa quramyna qorǵanys mınıstri, Mańǵystaý oblysynyń ákimi, Eńbek jáne halyqty áleýmettik qorǵaý, Tótenshe jaǵdaılar, Densaýlyq saqtaý, Kólik mınıstrlikteriniń basshylyǵy, Bas áskerı prokýror, sondaı-aq shekara qyzmetiniń ókilderi kirdi, — delingen habarlamada.
Premer-mınıstr Oljas Bektenov Komıssııa tóraǵasy Qanat Bozymbaevqa oqıǵa ornyna shuǵyl baryp, áskerı qyzmetshilerdiń qaza bolý sebepterin tergep-tekserýdi qamtamasyz etý jáne qaza tapqandardyń otbasylaryna qajetti kómek kórsetý sharalaryn qabyldaýdy tapsyrdy.
Aldyn ala málimet boıynsha, teńizge 19 áskerı qyzmetshi ketken. Qazirgi ýaqytta olardyń toǵyzy qaza bolǵany belgili.
Úsh áskerı qyzmetshi qutqaryldy. Olardyń bireýi aýrýhanaǵa jatqyzyldy. Qalǵandaryn izdeý jumystary jalǵasyp jatyr.
Oqıǵa ornyna qutqarý qyzmetteriniń kúshteri men quraldary dereý jiberilgen. Іzdestirý-qutqarý jumystaryna Áskerı-teńiz kúshteriniń, Tótenshe jaǵdaılar mınıstrliginiń bólimsheleri, avıatsııa jáne basqa da tıisti qyzmetter jumyldyryldy.
Oqıǵanyń barlyq mán-jaıyn anyqtap, izdestirý-qutqarý jumystaryn úılestirý úshin Qorǵanys mınıstrliginiń komıssııasy oqıǵa ornyna shuǵyl attandy. Komıssııaǵa Qorǵanys mınıstri, avıatsııa general-leıtenanty Dáýren Qosanov basshylyq etedi.
Qorǵanys mınıstrligi qaza bolǵan áskerı qyzmetshilerdiń týǵan-týystary men jaqyndaryna kóńil aıtyp, olardyń otbasylaryna qajetti kómek pen qoldaý kórsetiletinin málimdedi.
Aqtaý garnızonynda oqý-jattyǵý barysynda áskerı qyzmetshilerdiń qaza bolý faktisi boıynsha qylmystyq is qozǵalyp, tergeý bastaldy.
Bas prokýratýranyń málimetinshe, jedel-tergeý toby qurylyp, oqıǵa ornynda Іshki ister mınıstrliginiń, Tótenshe jaǵdaılar mınıstrliginiń jáne prokýratýra organdarynyń qyzmetkerleri jumys istep jatyr.
