Bozymbaev: Qaraǵandy oblysy jylytý maýsymyna 15 qyrkúıekke deıin daıyn bolýy kerek
ASTANA. KAZINFORM — Qanat Bozymbaev Qaraǵandy oblysynyń kommýnaldyq ınfraqurylymynyń jylytý maýsymyna daıyndyǵyn tekserdi, dep habarlaıdy Úkimettiń baspasóz qyzmeti.
Premer-mınıstrdiń orynbasary Qanat Bozymbaev Qaraǵandy oblysyna barǵan issapary barysynda «Energetıkalyq jáne kommýnaldyq sektorlardy jańǵyrtý» ulttyq jobasynyń júzege asyrylýyn jáne tirshilikti qamtamasyz etý nysandarynyń aldaǵy jylytý maýsymyna daıyndyǵyn tekserdi.
Nysandardy aralaý barysynda vıtse-premer Temirtaý men Qaraǵandy qalalarynda bolyp, jylý magıstraldarynyń, sý tazartý qurylystarynyń, elektr jelileri men qosalqy stansalardyń jóndeý jumystarymen tanysty. Bul ınfraqurylymnyń basym bóligi 1960-1990 jyldary paıdalanýǵa berilgen, al keıbir nysandardyń tozý deńgeıi 70-80%-ǵa jetken.
Temirtaýda negizgi jumys jylý jelilerin jańartýǵa baǵyttalǵan. JM-3 jylý magıstraliniń 8,27 shaqyrym qubyry qaıta jańartylyp jatyr. Bul jeli 60 myńǵa jýyq turǵyndy nemese 312 kópqabatty úı men 22 áleýmettik nysandy qamtamasyz etip otyr. Magıstral 1967 jyldan beri paıdalanylyp keledi, tozý deńgeıi 75%-ǵa jetken, al sońǵy bes jylda munda 38 aqaý tirkelgen.
Sondaı-aq vıtse-premerge byltyr aıaqtalǵan joba — JM-2A jylý magıstraliniń 3,64 shaqyrymyn jóndeý jumystarynyń nátıjesi kórsetildi. Búgingi tańda bul magıstral 7,2 myńnan astam abonentti jylýmen qamtamasyz etýde. Buryn tozý deńgeıi 75%-ǵa jetken jáne sońǵy bes jylda 31-ge jýyq aqaý shyqqan bul jelide «Energetıkalyq jáne kommýnaldyq sektorlardy jańǵyrtý» ulttyq jobasynyń nátıjesinde alǵash ret jylytý maýsymy eshqandaı apatsyz ári ajyratýsyz ótti.
Budan ári Premer-mınıstrdiń orynbasarynyń jumys sapary Qaraǵandy qalasynda jalǵasyp, onda sýmen jabdyqtaý júıesine erekshe nazar aýdaryldy. Munda 50 jyldan astam ýaqyt boıy kúrdeli jóndeý kórmegen «Qaraǵandy Sý» JShS-niń sý tazartý keshenin qaıta jańartý jumystary júrgizilip jatyr. Nysannyń tozý deńgeıi 80%-ǵa jetken, tek sońǵy úsh jyldyń ózinde munda 89 apat bolǵan.
Bul keshenniń úzdiksiz jumys isteýi Qaraǵandy, Temirtaý qalalary men Aqtas kentiniń 695 myńǵa jýyq turǵynyn, sondaı-aq Qaraǵandy JEO-3 ortalyǵyn aýyzsýmen qamtamasyz etýge tikeleı áser etedi. Qazirgi ýaqytta munda negizgi qurylystar men tehnologııalyq jabdyqtar jańartylyp jatyr. Jobanyń quny – 15,1 mlrd teńge.
Sondaı-aq Qanat Bozymbaevqa oblystyń elektr jelilerin jańǵyrtý jumystary tanystyryldy. Óńirde elektr berý jelileri men qosalqy stansalardy qaıta jańartý boıynsha alty joba ázirlengen. Onyń tórteýi qazirdiń ózinde júzege asyrylyp jatyr: 110 kV eki jeli men eki qosalqy stansa jańartylady. Bul jumystar jelilerdiń tozýyn azaıtýǵa jáne aımaqty elektrmen qamtamasyz etý senimdiligin arttyrýǵa baǵyttalǵan.
Jumys sapary Qaraǵandydaǵy M-3 jylý magıstralin aralaýmen aıaqtaldy. Onda vıtse-premer qalanyń eki iri jylý magıstralin qaıta jańartý barysymen tanysty. M-3 jelisinde 2,4 shaqyrym qubyr jańartylyp jatyr. Mundaǵy magıstral 183 myńǵa jýyq turǵyndy, 817 kópqabatty úıdi jáne 611 áleýmettik-mádenı nysandy jylýmen qamtamasyz etedi. Qaıta jańartýdan keıin qoldanystaǵy júıeniń tıimdiligi artyp, jańa turǵyn úılerdi, áleýmettik nysandar men bıznes nysandaryn qosýǵa múmkindik bolady.
Sonymen qatar M-2 jylý magıstrali men №2 sorǵy stansasyn qaıta jańartý jumystary jalǵasýda. Nátıjesi qazirdiń ózinde aıqyn: jylytý maýsymyndaǵy aqaýlar sany 36-dan ekige deıin azaıdy. Joba tolyq aıaqtalǵannan keıin Qaraǵandynyń ortalyq bóligindegi 64 myńǵa jýyq turǵyn turaqty jylýmen qamtamasyz etiledi.
Óńirdegi jumystyń barysyn baǵalaı kele, Qanat Bozymbaev qazirgi basty mindet — eń tozyǵy jetken ýchaskelerdi ýaqytynda jańartyp, kommýnaldyq ınfraqurylymdy jylytý maýsymyna tolyq daıyndaý ekenin atap ótti.
— Qaraǵandy oblysynda jumys jaqsy qarqymen júrip jatyr: jylý men elektr jelileriniń eń qatty zaqymdalǵan ári tozyǵy jetken bólikteri aýystyrylyp jatyr. Óńirdiń mindeti — barlyq qajetti jumysty 15 qyrkúıekke deıin aıaqtap, gıdravlıkalyq synaqtardy ótkizý jáne jylytý maýsymyna júz paıyz daıyndyqpen kirý. Túptep kelgende, munyń bári halyq úshin jasalyp jatyr. Jylý, sý jáne elektr qýaty – adam kúndelikti paıdalanatyn tirshilik kózderi. Sondyqtan bizdiń maqsatymyz — bul qyzmetterdiń úzdiksiz ári tıimdi jumys isteýin qamtamasyz etip, halyqtyń turmys sapasyn arttyrý, — dedi Qanat Bozymbaev.
Qaraǵandy oblysyndaǵy jobalardy júzege asyrý kezinde otandyq óndirýshilerdiń ónimderi belsendi túrde qoldanylyp keledi. Sapar barysynda tanystyrylǵan nysandardyń basym bóliginde qazaqstandyq ónimder 95%-dan asady, al keıbir jobalar boıynsha 100%-ǵa jetedi.
Sapar qorytyndysy boıynsha Qanat Bozymbaev qurylys-montajdaý jumystarynyń merzimi men sapasyn qatań saqtaýdy tapsyrdy. Jylytý maýsymynyń apatsyz ótýine tikeleı áser etetin nysandarǵa erekshe nazar aýdarylýy tıis. Oblys ákimdigi men jaýapty uıymdarǵa bekitilgen kesteden keshikpeý jáne jańǵyrtylatyn ınfraqurylymnyń kúzgi-qysqy kezeńge tolyq daıyn bolýyn qamtamasyz etý tapsyryldy.
Aıta keteıik, «Energetıkalyq jáne kommýnaldyq sektorlardy jańǵyrtý» ulttyq jobasy 2029 jylǵa deıin júzege asyrylady jáne ol ınfraqurylymnyń tozý deńgeıin 40%-ǵa deıin tómendetýge, sondaı-aq apat qaýpin 20%-ǵa azaıtýǵa baǵyttalǵan.
Buǵan deıin Aqtóbede áleýmettik nysandardyń jylytý maýsymyna daıyndyǵy týraly jazǵanbyz.
