Bozymbaev energetıka jáne kommýnaldyq sektorlardy jańǵyrtý boıynsha mindetter júktedi
ASTANA. KAZINFORM – Premer-mınıstrdiń orynbasary Qanat Bozymbaev energetıka jáne kommýnaldyq sektorlardy jańǵyrtý jónindegi Ulttyq jobany iske asyrýǵa arnalǵan jobalyq keńseniń otyrysyn ótkizdi. Bul týraly Úkimettiń baspasóz qyzmeti habarlady.
Otyrys barysynda 2025 jylǵa arnalǵan ınvestıtsııalyq jospar men naryqtyq qarjylandyrýdy tartý arqyly pılottyq jobalardy iske asyrý tetikteri boıynsha usynystar qaraldy. Qanat Bozymbaev uıymdastyrýshylyq irkilisterdiń aldyn alý maqsatynda pılottyq jobalardy iske asyryp jatqan tabıǵı monopolııa sýbektileri (TMS) úshin nusqaýlyq ázirleýdi tapsyrdy.
Budan bólek, vıtse-premer TMS-tiń elektrondy satyp alý platformasy men EPC-merdigerler men jetkizýshilerdi irikteý júıesin jedeldetip qurýdy jáne salalyq memlekettik organdarǵa qajetti ónim kólemderin aıqyndap, irikteý kezeńinde barlyq sybaılas jemqorlyq táýekelderin boldyrmaıtyn tetikterdi ázirleýdi tapsyrdy.
Sonymen qatar Qanat Bozymbaev Smart Turmys biryńǵaı platformasyn iske qosý jáne esepke alý aspaptaryna qoıylatyn standarttar men tehnıkalyq talaptardy ázirleý úshin jumys tobyn qurýdy tapsyrdy. Jeke jaýapkershilik ónerkásip jáne qurylys vıtse-mınıstri, jumys tobynyń jetekshisi Jánnat Dúbirovaǵa júkteldi.
Qanat Bozymbaev tıimdi kommýnıkatsııany qamtamasyz etý maqsatynda ınvestorlar, merdigerler, otandyq óndirýshiler men TMS úshin call-ortalyqty jáne Ulttyq jobany túsindirý úshin energetıka jáne kommýnaldyq sektorlardy jańǵyrtýdyń resmı saıtyn iske qosýdy tapsyrdy.
Ulttyq jobany tıimdi iske asyrý maqsatynda múddeli memlekettik organdar arasynda úılesimdi ózara is-qımyldy qamtamasyz etý boıynsha jeke jaýapkershilik ulttyq ekonomıka vıtse-mınıstri Asan Darbaevqa júkteldi.
Aıta ketelik Qanat Bozymbaev «Energetıka jáne kommýnaldyq sektorlardy jańǵyrtý» Ulttyq jobasyn júzege asyrý barysyn teksergen edi.