Bozymbaev energetıka salasyndaǵy satyp alý platformasyn 1 qarashaǵa deıin engizýdi tapsyrdy
ASTANA. KAZINFORM — Energetıkalyq jáne kommýnaldyq sektorlardy jańǵyrtý jónindegi jónindegi Ulttyq jobany iske asyrý boıynsha jobalyq keńseniń otyrysynda 2029 jylǵa deıingi jańǵyrtý kartasyn ázirleý, Ulttyq jobaǵa Tsıfrlyq teńgeni engizý, halyqaralyq qarjy ınstıtýttaryn tartý jáne aspaptandyrýdyń qamtylýy men qajettiligin taldaý nátıjeleri qaraldy. Bul týraly Úkimettiń baspasóz qyzmeti habarlady.
2026 jylǵa qaraı elimiz boıynsha 14 myń shaqyrymnan astam ınjenerlik jelilerdi jóndeý jáne 8 myńnan astam jabdyqty aýystyrý úshin 1 trln teńgeden astam qarjy qajettigi aıqyndaldy.
Kommýnaldyq kásiporyndardyń ınvestıtsııalyq tartymdylyǵyn arttyrý maqsatynda olardy irilendirý boıynsha jumys júrgizilýde. Memlekettik baǵaly qaǵazdar (MBQ) tetigi aıasynda tórt óńirde jylý jelilerin jáne sý tazartý keshenderin jańǵyrtýǵa baǵyttalǵan 10 pılottyq jobaǵa bólingen 22,5 mlrd teńgeniń 47%-y ıgerildi.
«Báıterek» holdıngi Dúnıejúzilik bank, Eýropa qaıta qurý jáne damý banki, sondaı-aq Eksımbankpen belsendi yntymaqtastyq ornatyp, olardyń jobalardy qarjylandyrýǵa daıyn ekenin atap ótti.
Ónerkásip jáne qurylys mınıstrligi óńirler boıynsha «aqyldy» esepteý aspaptaryn ornatý qajettiligin anyqtady: 3 mln astam sý eseptegish, 3 mln astam elektr energııasy eseptegish jáne 30 myń jylý eseptegish ornatý josparlanyp otyr.
Otyrys barysynda Qanat Bozymbaev Ulttyq joba aıasynda ázirlenip jatqan elektrondy satyp alý platformasynyń daıyndyq deńgeıin tekserip, onyń alǵashqy úsh modýlin 1 qarashaǵa deıin iske qosýdy tapsyrdy.
Sondaı-aq vıtse-premer EKSJ jobalary boıynsha jyldar men óńirler boıynsha qajettilikti aıqyndap, derekterdi otandyq óndirýshilerge berýdi jáne B2B-kezdesýler ótkizýdi tapsyrdy.
Jóndeý jumystaryna qajettilikter týraly aqparat modernization.kz resmı saıtynda jáne memlekettik organdardyń ınternet-resýrstarynda jarııalanady.
Aıta ketelik Qazaqstan men Qytaı taý-ken metallýrgııasynda birlesken jobalardy iske asyratyny týraly jazǵan edik.