Bozymbaev Atyraý ekologııasyna qatysty bir aıda naqty sheshim qabyldaýdy tapsyrdy
ASTANA. KAZINFORM — Premer-mınıstrdiń orynbasary Qanat Bozymbaev Atyraýda ekologııalyq qaýipsizdik, sý resýrstaryn tıimdi paıdalaný jáne «Aýyl amanaty» jobasyn iske asyrý máseleleri boıynsha keńeıtilgen jıyn ótkizdi. Bul týraly Úkimettiń baspasóz qyzmeti málim etti.
Oǵan salalyq mınıstrlikterden, oblys ákimdiginen jáne iri ónerkásiptik kásiporyndardan ókilder qatysty.
Jıynda qaralǵan negizgi máseleniń biri — sý tutyný kólemin azaıtý jáne kásiporyndardy aınalma jáne keri paıdalanylatyn sýmen jabdyqtaý júıesine kóshirý. Atyraý munaı óńdeý zaýytynda júrgizilgen jańǵyrtý jumystarynyń nátıjesinde aınalma sýmen jabdyqtaý júıeleriniń sany birden altyǵa kóbeıgen. Óndiris kólemi artqanyna qaramastan, sońǵy jyldary Jaıyq ózeninen alynatyn sý kólemi jylyna 8,4 mln tekshe metrden 6,6 mln tekshe metrge deıin azaıdy. Aldaǵy ýaqytta zaýyt bul kórsetkishti 4,6 mln tekshe metrge deıin qysqartýǵa múddeli.
Sondaı-aq káriz tazartý qurylystaryn rekonstrýktsııalaý jáne aldaǵy ýaqytta býlaný alańdaryn, onyń ishinde «Sasyqsaı» aýmaǵyn paıdalaný máseleleri qaraldy.
Qanat Bozymbaev bir aı ishinde sol jáne oń jaǵalaýdaǵy káriz tazartý qurylystary men «Sasyqsaı» alańyna qatysty naqty sheshimder shyǵarýdy tapsyrdy.
— Atmosferalyq aýanyń sapasy men ekologııalyq monıtorıng máselelerine de aıryqsha nazar aýdaryldy. Qazirgi tańda «Qazgıdromet» derekteri, NCOC ekologııa beketteri men «AMÓZ» qurylǵylarynan alynatyn málimetter ortaq júıege biriktirilmegen. Osyǵan baılanysty derekterdi avtomatty túrde ıntegratsııalaý josparyn ázirleý jáne ónerkásiptik nysandardaǵy baqylaý quraldarynyń jelisin keńeıtý jóninde tapsyrma berildi, — delingen habarlamada.
Budan bólek, Kaspıı teńiziniń taıazdanýy, jerdiń tozýy jáne ónerkásiptik kásiporyndardyń sanıtarııalyq-qorǵaý aımaqtarynyń jaı-kúıi de talqylandy.
Qanat Bozymbaev otandyq jáne sheteldik sarapshylardy, ekologtar men sala mamandaryn tarta otyryp, jumys tobyn qurý týraly pármen berdi. Olar bir aı ishinde ekologııalyq qaýipsizdik, atmosferalyq aýanyń monıtorıngi, sýdy tıimdi paıdalaný, tazartý qurylystaryn jańǵyrtý jáne tehnogendik júktemeni azaıtý baǵyttaryn qamtıtyn jol kartasyn ázirleýi tıis.
Jıyn barysynda aýyl turǵyndarynyń tabysyn arttyrýǵa, kásipkerlikti damytýǵa jáne jańa jumys oryndaryn ashýǵa baǵyttalǵan «Aýyl amanaty» jobasynyń iske asyrylý barysy da qaraldy.
Atyraý oblysynda joba baıaý iske asyp jatqany aıtyldy. 2025 jylǵa bólingen qarajattyń 72,6%-y ıgerilgen. 2026 jylǵy mamyrda qosymsha qarjy bólingen, soǵan qaramastan oblysta búginge deıin birde-bir joba maquldanbaǵan jáne bir teńge de ıgerilmegen.
— Buǵan deıin berilgen tapsyrmalarǵa qaramastan, óńirdegi jumystyń qarqyny áli de tómen. Bul jaýapty laýazymdy tulǵalardyń óz mindetin tıisti deńgeıde oryndamaı otyrǵanyn jáne jobaǵa jetkilikti kóńil bólinbeıtinin kórsetedi, — dedi Qanat Bozymbaev.
Oblys ákimdigine 2026 jylǵa bólingen qarajatty tolyq ári ýaqytynda ıgerýdi jáne jobalardy belgilengen merzimde sapaly iske asyrýdy qamtamasyz etý tapsyryldy.
Ulttyq ekonomıka mınıstrligine bul máseleni qatań baqylaýǵa alý júkteldi. Qazannyń qorytyndysy boıynsha qarajatty ıgerý qarqyny tómen bolsa, osy baǵytqa jetekshilik etetin saıası memlekettik qyzmetshini tártiptik jaýapkershilikke tartý týraly usynys engiziledi.
Áleýmettik-kásipkerlik korporatsııanyń jumysy da jeke qaraldy. Qanat Bozymbaev korporatsııa jumysyn júıeleýdi jáne jobaǵa qatysýshylardan talap etiletin qujattar sanyn azaıtyp, artyq bıýrokratııalyq rásimderdi qysqartýdy tapsyrdy.
Keńeıtilgen otyrysta óńirlik standarttar júıesi boıynsha josparly kórsetkishterdiń oryndalmaý sebepteri jáne óńirler arasyndaǵy alshaqtyqtyń saqtalýy da talqylandy.
Óńirlik standarttar júıesi halyqtyń ómir súrý sapasy men negizgi áleýmettik jáne ınfraqurylymdyq qyzmetterdiń qoljetimdiligin baǵalaıdy.
Atyraý oblysynyń ákimdigine Óńirlik standarttar júıesi aıasynda damý qarqyny tómen baǵyttarǵa bıýdjet qarajatyn bólýde basymdyq berý júkteldi.
Eger jumys negizsiz sozylatyn bolsa, jaýapty laýazymdy tulǵalardyń áreketine tıisti baǵa berilmek.
