Bozymbaev Aqtaý mańyndaǵy ushaq apatyna qatysty: shyndyq jyl sońyna deıin belgili bolady

ASTANA. KAZINFORM – Aqtaý mańyndaǵy ushaq apatyna qatysty qorytyndy birneshe aı kóleminde daıyn bolady. Bul týraly Premer-mınıstrdiń orynbasary Qanat Bozymbaev málim etti.

- Kólik mınıstrligi qarqyndy jumys júrgizip jatyr, halyqaralyq sarapshylarmen birlesken jumys aıasynda bizdiń mamandar jańa daǵdyny meńgerdi. Túrli elden kelgen halyqaralyq sarapshylar da jumysqa qatysyp jatyr. Ushaq qaldyǵynyń bir bóligi áli de shetelde saraptamadan ótip jatyr, jaqynda elge qaıtarylady. Qazir taldaý kezeńi aıaqtalyp qaldy, qazir qorytyndy esep daıyndaý satysynda, - dedi Qanat Bozymbaev Úkimet úıinde ótken baspasóz máslıhatynda.

Úkimet basshysy orynbasarynyń málimdeýinshe, qorytyndy esep birneshe aıda daıyn bolady.

- Qazirgi jalǵyz másele, ushaqtyń qalaı zaqymdanǵany. Bul máseleni saıasılandyrǵym kelmeıdi, suraqqa quqyq qorǵaý organdary júrgizip jatqan saraptama qorytyndysy jaýap berýi tıis. Meniń bilýimshe, olar ózge elderge suraý joldaǵan, ol elderde fıýzelıajdan tabylǵan zaqymdaýshy elementteri bar. Sondyqtan, shyndyq jyl sońyna deıin belgili bolady dep oılaımyz. Barlyq talap útir-núktesine deıin tolyq oryndalady, - dep tolyqtyrdy Q. Bozymbaev.

Eske sala keteıik, byltyr 25 jeltoqsanda Aqtaý mańynda Azerbaijan Airlines ushaǵy apatqa ushyrady. Bortta 67 adam, onyń ishinde bes ekıpaj múshesi bolǵan. Apat saldarynan 38 jolaýshy qaza taýyp, 29 adam aman qaldy.

Keıin Brazılııa Áskerı-áýe kúshteriniń Áýe apattaryn zertteý ortalyǵynyń (Cenipa) mamandary AZAL áýe kompanııasynyń apatqa ushyraǵan Embraer 190 ushaǵynyń qara jáshigin taldaýǵa kiriskenin habarlaǵan bolatyn.

Bıyl 4 aqpanda Aqtaý mańyndaǵy ushaq apaty boıynsha tergeýdiń esebi jarııalandy.