Bojko Kókpektidegi apatqa kinálilerdiń atyn atap, túsin tústeýge ýáde etti
QARAǴANDY. QazAqparat - Bes adamnyń ómirin qıyp ketken Kókpektidegi apat sebepteri tergeý qorytyndysynyń aktisi jaqyn ýaqytta jarııalanatyn bolady. Bul týraly búgin QR Tótenshe jaǵdaılar mınıstri Vladımır Bojko málim etti.
"Aktqa qol qoıyldy, men ony Úkimetke joldadym. Sizder qalasańyzdar, jaqyn ýaqyttary jarııalaıtyn bolamyz", - dedi V.Bojko Kókpektidegi keńesten keıin tilshilerge bergen suhbatynda.
Ol oǵan kináli TJ sheneýnikterin dál qazir atamaǵanymen, tergeý barysynda anyqtalǵan jaıttardy aıtýǵa ýáde etti. "Tıisti baspasóz málimetin daıyndap, sizderge joldaıtyn bolamyn, ruqsat bolsa", - dedi ol.
Onyń sózine qaraǵanda zalal somasy anyqtaldy. "Men qazir keńes barysynda japa shekken turǵyndardyń búlingen múlkin óteýge bólingen qarajatty ataǵan bolatynmyn. Zalal somasy da sol shamada. Biraq men bul jerde aryqtyń qunyn qosyp otyrǵan joqpyn", - dep atap ótti mınıstr. Bunyń aldynda keńes kezinde Bojko búlingen úıler men kelmeske ketken úı kerek-jaraǵyn óteýge halyqqa 256 mln. teńge bólingendigin aıtqan bolatyn. Eske sala keteıik, 31 naýryz túni Qaraǵandy oblysy Kókpekti aýylynda dambany sý shaıyp, 300-den astam úıdi qıratyp ketken. Sonyń saldarynan 5 adam qaza taýyp, 12 adam aýrýhanaǵa jatqyzyldy. Qaıtys bolǵandardyń otbasylaryna 1 mln. teńgeden ótemaqy tólendi.
Mamandar zertteýinen keıin, 49 úı apattyq jaǵdaıda dep tanylsa, 273 úıge kúrdeli jóndeý qajet bolǵan.
Apat saldarlaryn anyqtaý maqsatynda Úkimette V.Bojkonyń tóraǵalyyǵymen vedomstvoaralyq komıssııa quryldy. Tótenshe jaǵdaıǵa baılanysty birqatar memlekettik sheneýnik pen sý qoımasynyń ıelerine qatysty qylmystyq ister qozǵaldy. Oblystyq prokýratýranyń habarlaýynsha, qazirgi ýaqytta birneshe tulǵaǵa aıyptar taǵyldy.
