Bojko «asfaltta óskenderdi» aýylda jumys isteýge mindetteýdi usyndy
ASTANA. QazAqparat - Jastar agrarlyq ýnıversıtterdi aıaqtaǵanymen, aýylǵa baryp jumys istemeıdi. Bul týraly Parlament Májilisindegi Úkimet saǵatynda QR Premer-Mınıstriniń orynbasary - Aýyl sharýashylyǵy mınıstri Asqar Myrzahmetov málim etti, dep habarlaıdy QazAqparat.
«Saladaǵy mamandarǵa toqtalsaq, kadr daıarlaý baǵytynda tıisti máseleni kóterip otyrmyz. Osy turǵyda Bilim jáne ǵylym mınıstrligine de tıisti usynystardy jasadyq. Sonyń ishinde «Bolashaq» baǵdarlamasyna sáıkes, aýyl sharýashylyǵy salasy mamandarynyń kvotasyn kóbeıtý eskerildi. Óıtkeni bul baǵytta joqtyń qasy. Sodan keıin bólinetin bilim granttaryn kóterý máselesi nazarǵa alynyp otyr. Bul rette oqýdy aıaqtaǵannan keıin sol mamandardyń mindetti túrde aýyldy jerge baryp, sol jerde belgili bir merzimde jumysty óteý qadamyn pysyqtaý kerek. Basqa bir joǵary oqý oryndaryna óte almaǵannan keıin, bizdiń aýyl sharýashylyǵy JOO-laryna túsip, oqýyn aıaqtaǵannan soń aýylǵa barmaıdy. Solardyń kóbisi qyz balalar ekeni de belgili», - dedi mınıstr «Agroónerkásiptik keshendi damytý kartalary - aýyl sharýashylyǵyn memlekettik qoldaýdy jetildirý jónindegi odan ári sharalar» taqyrybyn talqylaý kezinde.
Onyń sózine qaraǵanda, atalǵan máseleler toptastyrylyp, onyń júıeli sheshimin jasaý sharalary qaralyp jatyr.
Óz kezeginde Parlament Májilisi tóraǵasynyń orynbasary Vladımır Bojko da saladaǵy maman daıarlaýǵa qatysty pikirin qosty.
«Bizde «asfaltta ósken» kóp bala agrarlyq ýnıversıtterge oqýǵa túsip jatady. Keıin JOO-ny támamdasa da, aýylǵa baryp qyzmet etpeıdi. Eger de memleket onyń bilimine qarjy bólse, osy qarjymen tıisti talaptardy baılanystyrýǵa da quqyly dep paıymdaýǵa bolady. Máselen, «Bolashaq» qarjy bólse, kelisimshart bekitiledi jáne oǵan sáıkes maman 5-6 jyl qyzmetin óteýge mindetti. Sondyqtan bul salasynda da bilim berýde durys másele kóterilip otyr jáne ony tezdetip alǵa jyljytý kerek shyǵar. Árıne, bul bastamamen kelispeıtinder bolary anyq, alaıda JOO-ny aıaqtaǵannan keıin tıisti baǵyt boıynsha barǵysy kelmese, onda bilimge ketetin shyǵyndy ózi tólesin», - dep túıindedi sózin Bojko.
