Boıjetkenniń ólimine kináli avtobýs júrgizýshi sotta jaýap beredi
ALMATY. QazAqparat - Almatyda boıjetkendi qaǵyp óltirgen №126 baǵdarly avtobýsynyń júrgizýshisi sot aldynda jaýap beredi, dep habarlaıdy QazAqparat tilshisi qalalyq sottyń baspasóz qyzmetine silteme jasap.
Qylmystyq is Áýezov aýdandyq sotyna 3 mamyrda túsken. Sot otyrysy 29 mamyrda saǵat 12.00-de Áýezov aýdandyq sotynda ótedi.
Júrgizýshige QR KK 345-baby 3-bólimi boıynsha aıyp taǵylyp otyr.
Eske sala keteıik, qaıǵyly oqıǵa 18 sáýirde Tóle bı men Ótegen batyr kósheleriniń qıylysynda bolǵan. Kýágerlerdiń aıtýynsha, 126 baǵdarly avtobýs Tóle bı kóshesimen shyǵysqa qaraı shetki jolmen kele jatqan. Baǵdarshamnyń jasyl túsi jypylyqtaı bastaǵanda kelip toqtaǵan avtobýs jol shetinde turǵan 24 jastaǵy qyzdy oń jaq búıirimen ilip ketken. Soqqydan qyz birshama jerge ushyp túsip, alǵan jaraqatynan sol jerde kóz jumdy.
