Boıjetkendi qutqarǵan maıor: Bir sekýnd ta oılanǵan joqpyn
ASTANA. QazAqparat - Qaskóıdiń shabýylynan boıjetkendi qutqaryp alǵan Ulttyq ulannyń ofıtseri - maıor Tımýr Rahımov bolǵan oqıǵa týraly «QazAqparat» HAA tilshisine aıtyp berdi, dep habarlaıdy «QazAqparat» HAA tilshisi.
Maıor Ulttyq ulanǵa qarasty áskerı bólim komandıriniń tárbıe jáne ortalyq-quqyqtyq jumysy boıynsha orynbasary bolyp eńbek etedi.
«Men áý basta qarapaıym kıkiljiń dep oıladym. Jigiti boıjetkenimen ursysyp qalǵan bolar dep topshyladym. Biraq julysa bastaǵan ekeýin kórip, shabýyl jasamaq bolǵan jigittiń aıtarlyqtaı pıǵyly baryn ańǵardym. Aıǵaı salyp edim, jigit qasha jóneldi. «Toqta» degenge qaramaı, bir shaqyrymdaı artynan qýýǵa týra keldi. Qalyń jaýǵan qardyń ústinde men oǵan jetip alyp, ony qozǵaltpadym. Onyń qolynda pyshaq nemese tapansha bolýy múmkin degen oıda boldym», - deıdi telefon arqyly «QazAqparat» HAA tilshisine jaýap bergen ol.
Tımýr Rahımov qaskóıdi tártip saqshylary kelgenshe tapjyltpadym. Aqyry, oqıǵa bolǵan jerge jaqyn mańnan sómke men pyshaq tabylǵan. Al bul ýaqytta boıjetkenniń qasyna jedel járdem qyzmeti men týystary kelgen eken. Bári sátti aıaqtalǵanyna kózderi jetip, qýanyshtan Rahımovqa alǵystaryn jaýdyra beripti.
«Bir sekýndta oılanǵan joqpyn. Men áskerı kıimde bolǵanymdyqtan, munyń ózi maǵan halyqty qorǵaýdy júkteıdi. Biz halyqqa qyzmet etemiz. Eldi qorǵaý - árbir áskerı qyzmetshiniń paryzy. Ulttyq ulannyń áskerı qyzmetshisinde bul jaýapkershiliktiń júgi eki ese aýyr. Meniń jasaǵan áreketim ózge de áskerılerge úlgi bolar degen senimdemin», - deıdi ol.
Tımýr Rahımov mundaı jaǵdaı basynan tuńǵysh ret ótkenin tilge tıek etti.
«Shynymdy aıtsam, mundaı jaǵdaıǵa tap bolyp kórmeppin. Qutqaryp alǵan boıjetkendi taýyp alyp, jaǵdaıyn bilsem deımin. Sebebi, týystary onyń psıhologııalyq turǵyda aýyr zardap shekkenin aıtady. Qazir týystary ony jalǵyz jiberýge qorqyp otyrǵan kórinedi», - deıdi T.Rahımov.
Maıordyń aıtýynsha, ustalǵan jigit Ózbekstan eliniń týmasy bolyp shyqqan. Buryn RF-da 10 jyl túrmede otyrǵan.
Eske sala ketsek, buǵan deıin Astana qalasynyń Saryarqa aýdanynda Ulttyq ulan ofıtseri maıor Tımýr Rahımov temir torda jazasyn ótegen qylmyskerdi qolǵa túsirgeni habarlanǵan bolatyn.
