Boıymyzdaǵy úreı men kúdikten arylý qajet – Darıǵa Nazarbaeva
NUR-SULTAN. QazAqparat – Parlament Senatynyń tóraǵasy Darıǵa Nazarbaeva palatanyń jalpy otyrysy men komıtet otyrystaryna shaqyrtylatyn adamdardyń sanyn shekteýdi tapsyrdy, dep habarlaıdy QazAqparat tilshisi.
«Ózderińiz bilesizder, elde tótenshe jaǵdaı jarııalandy. Bul der kezinde qabyldanǵan ári óte qajetti shara. Osy qadamdardy jaqsy túsinemiz. Osyǵan baılanysty tıisti buıryqqa qol qoıdym. Tótenshe jaǵdaı kezeńinde barlyq issaparlar men josparly buqaralyq sharalarǵa tyıym salynady. Al zań shyǵarýshylyq jumys jalǵasady. Biz múmkindiginshe jalpy otyrys pen komıtet otyrystaryna shaqyrtylatyn adamdardyń sanyn shekteýmiz kerek», - dedi D. Nazarbaeva.
Osy oraıda ol qujattarǵa qatysty jumystardyń kóbisin qashyqtan júrgizýge bolatynyn, ol úshin tehnıkalyq múmkindik bar ekenin atap ótti.
«Apparat qyzmetkerleriniń 70 paıyzdan astamy úıden jumys isteý rejimine aýysty, al qalǵandaryna qysqartylǵan jumys kúni belgilendi. Senat ǵımaratynda kúnine birneshe ret qajetti sanıtarlyq-epıdemıologııalyq jumystar júrgiziledi», - dedi D. Nazarbaeva.
«Bizge erteńgi kúnge senimmen qarap, boıymyzdaǵy úreı men kúdikten arylý qajet. Qazirgi tańda barshamyz bári jaqsy bolatyny týraly oılap, jaqsylyqtan úmittenýimiz kerek. Biz – talaı synda shynyqqan myqty halyqpyz. Biz bárin jeńemiz. Aldaǵy senbi kúni jarqyn merekemiz Naýryz keledi. Bul – kóktem merekesi, jandaný men gúldený meıramy. Úmit pen jańarý merekesi. Barshańyzǵa densaýlyq pen bar jaqsylyqty tileımin! Naýryz bizge bul jyly tek baqyt alyp kelsin, qaıǵy men aýyrtpalyqtan aryltsyn!», - dedi Senat tóraǵasy.
