Boıyńyzda adamdyq qasıet bolmasa, kásibı sheberligińizdiń quny kók tıyn - Dımash
Álemge áıgili ánshi, Qazaqstannyń Halyq ártisi Dımash Qudaıbergen stýdentterdiń shaqyrýymen Eýrazııa ulttyq ýnıversıtetine bardy, dep habarlaıdy Kazinform.
Ol oqý ordasymen tanysyp, bilim alýshylarmen kezdesti jáne stýdenttik orkestrmen birge tanymal kúılerdi oryndady.
Dımash Qudaıbergen EUÝ-daǵy Kúltegin eskertkishi jáne Jazý tarıhy murajaıymen tanysty.
Stýdenttermen kezdesýde Dımash Qudaıbergen óziniń balalyq shaǵy, qalyptasýy, ósken ortasy týraly aıtyp, súıikti kitaptarymen bólisti, ómirge degen josparlary, sportqa beıimdiligi týraly suraqtarǵa jaýap berdi.
EUÝ jastary ánshiden óziniń boıyndaǵy mańyzdy adamı qasıet –qarapaıymdylyqty qalaı saqtaýǵa bolatynyn surady.
«Óz isińizde qanshalyqty kásibı bolsańyz da, eń bastysy qarapaıymdylyq jáne rýhanı baı bolý. Boıyńyzda adamdyq qasıet bolmasa, kásibı sheberligińiz qansha jerden joǵary deńgeıde bolsyn, onyń quny kók tıyn», - dep atap ótti ártis.
Kezdesý barysynda Dımash Qudaıbergen men Eýrazııa ulttyq ýnıversıtetiniń «Dala sazy» stýdenttik orkestri ımprovızalyq ónerimen tánti etti. Olar dombyramen qazaqtyń áıgili kúılerin oryndady.
«Ata-anamnyń otandyq mádenıettegi qyzmeti meniń taǵdyrymdy aıqyndaǵany sózsiz. Ómirde jaqsy tálimgerlerdi kezdestirý baqytyna ıe boldym. Qazaqstan Respýblıkasynyń eńbek sińirgen qaıratkeri Marat Oljabaıuly kezinde anamdy, keıin meni vokal ónerine baýlydy.
Ata-anam men úshin áli de alańdaıdy, men ár basqan qadamymdy otbasymnyń, halqymnyń batasy men qoldaýymen jasaımyn. 100 jasqa kelsem de, ata-anamnyń oı-pikirin, kózqarasyn qurmetteıtin bolamyn», – dep bastady alǵashqy jaýabyn tanymal ánshi.
Ánshi jastardyń bilim men ǵylymdaǵy jetistikteri týraly kópshilik arasynda aqparattandyrýdyń mańyzdylyǵyna nazar aýdardy.
Dımash Qudaıbergen óziniń súıikti kitaptary týraly da aıtty. Ásirese, Muhtar Áýezovtiń «Abaı joly» men Cherchılldiń «Eshqashan berilmeńiz» shyǵarmalaryn erekshe atap ótti.
«Men 5 jasymnan bastap mýzyka mektebinde oqı bastadym. Sodan ájem aıaǵy aýyrǵanyna qaramastan meni arqasyna salyp mektepke alyp baratyn. Men ony qýantyp, onyń maǵan salǵan eńbegi men jumsaǵan kúsh-jigerin aqtaı bilsem, júrekte shynaıy baqyt paıda bolady», - deıdi jas daryn.
Іs-shara sońynda EUÝ basshylyǵy Halyq ártisine qurmet kórsetip, qoıylǵan suraqtarǵa qyzyqty jaýaptary úshin alǵys bildirdi jáne ýnıversıtettiń joǵary marapattarynyń biri – Kúltegin medalin tabys etti.
Sondaı-aq ýnıversıtettiń barlyq jastar qaýymy atynan ánshige estelik retinde JOO-nyń fırmalyq jempiri men EUÝ stýdenti óz qolymen tikken ulttyq shapan tabystaldy.
Dımash Qudaıbergen ýnıversıtet ujymyna jyly qarsy alǵandary úshin alǵys aıtyp, stýdentterge oqýda tabys tiledi.
