«Boıalǵan aqsha» jobasy Atyraýda 30 jyl jóndelmegen jol qarjysyna qoldanylady
ATYRAÝ. KAZINFORM — Sybaılas jemqorlyqqa qarsy is-qımyl agenttigi memlekettik organdarmen birlesip «Aqshany boıaý» jobasyn engizýdi qolǵa aldy. Qazir atalǵan joba aýyl sharýashylyǵy, avtomobıl jáne temirjol qurylysy sekildi strategııalyq mańyzdy sektorlarda bastalǵan.
Sybaılas jemqorlyqqa qarsy is-qımyl agenttigi baspasóz qyzmetiniń málimetinshe, Memleket basshysynyń tapsyrmasyna sáıkes bul jobany «Tsıfrlyq teńge» platformasynda iske asyrý kózdelgen. Elimizde alǵash ret iske asyrylatyn tyń jobanyń qandaı tıimdi tusy bar?
— Bul bıýdjet qarjysynyń jumsalýyna baqylaýdy kúsheıtýge yqpal etedi. Qarjyny ıgerý kezinde ashyqtyqty qamtamasyz etip, jemqorlyq táýekelderin azaıtýda mańyzdy quralǵa aınalady. Bıýdjetten qarjy bólýden bastap, ony tolyq ıgergenge deıingi kezeńdi baqylaýǵa múmkindik beredi. Ár teńgege biregeı tsıfrlyq belgi qoıylyp, jymqyrý múmkindigin boldyrmaıdy, — dep habarlady agenttiktiń baspasóz qyzmeti.
«Aqshany boıaý» jobasy Atyraý oblysyndaǵy «Muqyr-Qulsary» baǵytyndaǵy joldy jóndeý jobasyna qoldanylady. Atalǵan joldy jóndeýge 2,1 mlrd teńge bólingen.
Bul jolǵa sońǵy 30 jyldan beri jóndeý júrgizilmegen. Endi «QazAvtojol» UK» AQ-nyń tapsyrysymen Qyzylqoǵa aýdanynyń Muqyr aýylynan Jylyoı aýdanynyń ortalyǵy — Qulsary qalasyna deıingi joldyń qurylysy bastalǵan.
«QazAvtojol» UK» AQ Atyraý oblystyq fılıaly dırektorynyń orynbasary Aslan Dúısenovtiń málimetinshe, atalǵan joldyń jalpy uzyndyǵy — 136 shaqyrym, eni — 7 metr.
— Bıyl 42 shaqyrym joldy jóndeý jumysy qolǵa alyndy. Ony «Atyraýınjstroı» JShS atqarady. Al 43-ten 136 shaqyrym aralyǵyndaǵy jol qurylysy úshin merdiger mekemeni anyqtaý úshin konkýrs ótip jatyr. Atalǵan joldaǵy jumystardy 2025-2026 jyldar aralyǵynda júrgizý josparlandy, — deıdi Aslan Dúısenov.
Onyń aıtýynsha, bul jol salynǵannan Qyzylqoǵa jáne Jylyoı aýdany aralyǵynda tike qatynas ornaıdy.
Buryn bul aýdannyń turǵyndary Qulsary qalasyna barý úshin Maqat aýdanyndaǵy Dossor kenti arqyly ótetin jolmen qatynaǵan.
— Joldy tolyq jóndegennen keıin Aqtóbe oblysynan kele jatqan kólikter Muqyr aýyly arqyly Qulsary qalasyna tike shyǵady. Bul ásirese júk kólikteri úshin tıimdi baǵyt bolady. Jol uzaqtyǵy kem degende 2 saǵatqa qysqarady, — deıdi Aslan Dúısenov.
Júrgizýshiler de atalǵan joldyń tezirek jóndelgenin qalaıdy. Qulsary qalasynyń turǵyny Nurlan Qılybaev buryn Muqyr aýylynda turǵan.
— Jumys babymen Qulsary qalasyna kóship kelgen edim. Biraq aýylyma jıi baramyn. Sol kezde aldymen Dossor kentine baryp, sodan soń Atyraý-Aqtóbe jolymen Muqyrǵa jetemin. Bul biraz ýaqyt alady. Endi Qulsary-Muqyr baǵytyndaǵy jol tezirek jóndelse, eki aralyqqa tez jetýge bolar edi, — deıdi Nurlan Qılybaev.
Qulsary-Muqyr baǵytyndaǵy joldyń boıynda eki eldi meken bar. Biri — Qońyraýly, ekinshisi — Tasqudyq. Ekeýi de Qyzylqoǵa aýdanynyń aýmaqtyq bólisine kiredi.
Qońyraýlynyń turǵyndary tórt túlik malmen ǵana otyr. Al Tasqudyq eldi mekeniniń keıbir turǵyndary munaı tasymaldaý kompanııasynda jumys isteıdi.
Eske sala ketelik, budan buryn Atyraý oblysynda bıyl salynǵan joldan 311 aqaý anyqtalǵanyn habarlaǵan bolatynbyz.
