Boı jetpeı me, oı jetpeı me: Qazaqstanda basketbol nege damymaı otyr
ASTANA. KAZINFORM – Qazaqstan basketbolynyń flagmany sanalatyn «Astana» sońǵy jyldary el chempıonatynda da, Batys Azııa arenasynda da turaqty túrde joǵary nátıje kórsetip keledi. Qazir klýb tek eldegi chempıondyq ataq úshin emes, ulttyq basketboldyń damýy úshin de jaýapkershilik arqalap otyr desek bolady. Osy oraıda, «Astana» kásibı basketbol klýby bas dırektorynyń orynbasary Azamat Qabdylqarımovpen suhbat qurdyq.
- Klýb qandaı jetistikterimen jankúıerin qýanta alady? Alda qandaı mindetter tur? Jalpy komandanyń damý strategııasyna toqtalyp ótseńiz...
- Negizgi komanda bıylǵy maýsymda Qazaqstan chempıonatynyń Ulttyq lıgasynda jáne Batys Azııa Sýperlıgasynda óner kórsetip jatyr. Ulttyq lıgada biz kesteniń kóshbasshysy atanyp otyrmyz, al Batys Azııa Sýperlıgasynda komandamyz ekinshi orynda keledi. Byltyr Azııa chempıony atanǵan «Ál-Rııadı» komandasyn óz alańymyzda jeńýimizdi sensatsııa deýge bolady.
Árıne, komanda aldynda eń joǵary nátıje kórsetý mindeti tur. Maqsatymyz — Qazaqstan chempıonatyn utý jáne Batys Azııa Sýperlıgasynyń aqtyq kezeńine ótý. Klýb sonymen qatar «Astana-Jastar» komandasymen VTB Jastar lıgasynda óner kórsetedi. Bul lıgada Reseıdiń úzdik jastar komandalary baq synaıdy jáne ol bizdiń jastar quramyna mol tájirıbe beredi.
- Komandaǵa jas oıynshylardy iriktegende klýb negizinen qandaı krıterıılerdi ustanady? Fızıkalyq qabiletten bólek, arnaıy psıhologııalyq nemese tehnıkalyq baǵalaý standarttary bar ma?
- Tek fızıkalyq kórsetkishter ǵana emes, sonymen qatar balanyń damý áleýeti, úılesimdiligi, psıhologııalyq qasıetteri men motıvatsııasy da eskeriledi.
Balalarǵa qoıylatyn naqty standarttar joq. Eń bastysy — antropometrııalyq kórsetkishter: boıy jáne boljamdy boıy (ata-anasynyń boıy men balanyń ósý qarqyny eskeriledi). Qol sozymynyń uzyndyǵy kóbine boıynan da mańyzdy. Qalǵan qabiletterdi jattyqtyrýshy damytady.
- Eger erekshe talantty oıynshynyń boıy qysqa bolsa, oǵan múmkindik berile me?
- Árıne, alasa boıly basketbolshylarǵa da múmkindik beriledi. Biraq olardyń belgili bir artyqshylyqtary bolýy kerek: jyldamdyq, eptilik, tehnıka jáne oıyndyq oılaý qabileti joǵary deńgeıde damýy mańyzdy. Boıdyń alasa bolýy tabysqa kedergi emes, eger ony shapshańdyqpen, batyldyqpen jáne eńbekqorlyqpen tolyqtyrsa. Dopty eki qolmen birdeı jaqsy meńgerý, qorǵaýshyǵa qıyndyq týdyrý úshin tómen drıblıng qoldaný jáne aldaý qımyldaryn tıimdi paıdalaný óte mańyzdy.
- Legıonerlerge memlekettik bıýdjetten qarjy berilmeıdi. Klýb sheteldik talanttardy tartý úshin jańa kommertsııalyq modelder qarastyryp jatyr ma?
- Óte jaqsy suraq. Biz legıonerlerdi qarjylandyrýdy demeýshilik qarajat, týrnırler men jarystardaǵy júlde aqshalary, bılet satýdan túsken tabys jáne óz qyzmetimizden túsetin kirister arqyly júzege asyryp otyrmyz.
- Al «Astana» oıynshylaryna Eýropa lıgalarynda tájirıbe jınaý múmkindigin usyný, sheteldik klýbtarǵa jalǵa berý ne basqa da jospar bar ma?
- Mundaı tájirıbe balalar basketbolynan bastalýy kerek. Qazaqstanda keıbir jas basketbolshylar halyqaralyq tájirıbesin 18 jastan bastaıdy, al bul halyqaralyq deńgeıde jaqsy nátıje kórsetý úshin kesh sanalady. Sondyqtan biz «Astana Jastar» komandasyn Reseıdiń VTB jastar lıgasynda óner kórsetýge jiberdik. Akademııa tárbıelenýshileri sheteldik jarystarǵa qatysa bastady. Eger bizdiń basketbolshylarǵa sheteldik myqty klýbtardan shaqyrý kelse, biz oǵan qarsy bolmaımyz.
- Elimizde fýtbol nemese bokspen salystyrǵanda basketbol kenje damyp keledi. Osy jaǵdaıdy túzetý úshin qandaı sharalar qabyldaý kerek dep oılaısyz?
- Qazaqstandaǵy basketboldy damytý birneshe baǵytty qatar qamtýdy qajet etedi.
Birinshi, balalar men jastar basketbolyn damytý: sektsııalar men akademııalardy standartqa saı jabdyqtalǵan zaldarmen qamtamasyz etý, mektepter men stýdentter arasynda turaqty týrnırler ótkizý, jattyqtyrýshylardy zamanaýı ádistemelerge úıretý jáne balalardy erte jastan sportqa tartý.
Ekinshi – ınfraqurylym. Sport zaldaryn salý jáne jańartý, ashyq aspan astyndaǵy basketbol alańdaryn kóbeıtý qajet.
Úshinshi, kásibı klýbtar men lıgalardy damytý kerek. Bul - balalar komandalaryn ulttyq jáne halyqaralyq týrnırlerge qatystyrý, tájirıbeli jattyqtyrýshylardy tartý, jas oıynshylardy daıarlaý júıesin qalyptastyrý.
Tórtinshi, demeýshiler men medıany damytý mańyzdy, ıaǵnı jankúıerler bazasyn qalyptastyrý jáne basketboldy keń aýdıtorııaǵa tanymal etý kerek.
Sondaı-aq memlekettik jáne jeke bastamalardy qoldaý nazarda bolǵany jón. Sheteldik federatsııalarmen yntymaqtastyq ornatý jáne halyqaralyq baǵdarlamalarǵa qatysý arqyly tájirıbe almasyp, ulttyq basketbol deńgeıin kóterý mańyzdy.
Suhbattasqan Qurmanjan Aıger