«Boxy Wealth» qarjy pıramıdasynyń qyzmeti toqtady

ALMATY. KAZINFORM — QMA Almaty qalasy boıynsha departamenti «Boxy Wealth» qarjy pıramıdasynyń qyzmetin toqtatty.

— Uıymdastyrýshylar ózderin ınvestıtsııalyq kompanııa retinde tanystyryp, salymshylarǵa jarnamalyq materıaldardy qaraý arqyly joǵary tabys tabýdy usynǵan. Olar kún saıyn 5%-dan 10%-ǵa deıin, ıaǵnı aıyna 150%-dan astam jáne jylyna 1800%-dan joǵary kiris tabatynyna ýáde etken, — delingen habarlamada.

Sondaı-aq, referaldyq siltemeler arqyly jańa qatysýshylardy tartqan jaǵdaıda 10% kóleminde dıvıdend tóleý qarastyrylǵan.

Salymshylardyń aqshalaı qarajattary dropperlerdiń atyna rásimdelgen bank kartalaryna qabyldanyp, keıin jasyrý maqsatynda paıdalanylǵan krıptovalıýta ámııandaryna aýdarylǵan.

— Qazirgi ýaqytta 230 mln teńge kóleminde zalal keltirilgen 180-nen astam azamat jábirlenýshi dep tanylǵan, — delingen QMA habarlamasynda.

Qarjy pıramıdanyń uıymdastyrýshysy 2 aı merzimge qamaýǵa alyndy.

Tergeý jalǵasýda.

Qylmystyq-protsestik kodekstiń 201-babyna sáıkes ózge aqparat jarııa etýge jatpaıdy.

Aıta ketelik Óskemende qarjy pıramıdasyna jarnama jasaǵan áıel jazaǵa tartylǵan edi.