Botsvanada júzdegen pildiń nelikten qyrylǵany anyqtaldy
BOTSVANA. QazAqparat – Botsvanada júzdegen pil mıkroskopııalyq baldyrlardyń qurbany boldy. Bıylǵy jyldyń mamyr-shilde aılarynda kóptegen janýarlardyń kenetten qyrylýynyń sebebin zerttegen mamandar osyndaı qorytyndy shyǵardy, dep habarlaıdy QazAqparat Bı-Bı-Sı-ge silteme jasap.
Reındjerler Okavango ózeniniń saǵasynda aerofototúsirilim kezinde pilderdiń kóptegen óleksesi anyqtalǵan soń dabyl qaqqan. Kýágerler tiri pilderdiń de birtúrli, bir jerdi aınalshyqtap júrgenin jáne álsiz kóringenin baıandady.
Botsvanada afrıkalyq pilderdiń búkil popýlıatsııasynyń úshten bir bóligi tirshilik etedi. Bılik áýelde bul brakonerlerdiń isi dep sheshken, alaıda taldaý qorytyndylary 330 pildiń sýda tirshilik etetin tsıanobakterııalar, nemese kók-jasyl tústi baldyrlardan bólinetin toksınderden qyrylǵanyn kórsetti.
Tsıanobakterııalar – aǵynsyz jyly sýdaǵy ýly bakterııalar. Olar sýdyń basqa túske boıanýyna ákeledi. Qyrylǵan pilderdiń kóbi shaǵyn sý qoımalarynyń janynan tabyldy, alaıda mamandar olardyń qyrylýyna tsıanobakterııalar sebep bolǵanyna sene alǵan joq.
«Taldaý qorytyndylary boıynsha, pilderdiń qyrylýyna tsıanobakterııalardan bólinetin neırotoksınder sebep áser etken. Bul bakterııalar sýda tirshilik etedi», - dep málimdedi dúısenbi kúni ótken baspasóz máslıhatynda Bostvana jabaıy tabıǵat jáne ulttyq saıabaqtar departamentiniń bas sanıtarlyq dárigeri Mmadı Rýben.
