Botsvanada salmaǵy 1305 karat bolatyn sırek almas tabyldy
ASTANA. KAZINFORM – Botsvanada salmaǵy 1305 karat bolatyn zergerlik sapadaǵy sırek almas óndirildi. Bul – sońǵy jyldardaǵy eń iri oljalardyń biri, dep habarlaıdy reseılik TASS.
Basylymnyń málimetinshe, asyl tas Botsvananyń soltústik-shyǵysyndaǵy Karove kenishinen óndirilgen. Bul týraly kanadalyq taý-ken kompanııasynyń basshysy Ýılıam Lemb málimdedi.
– Bul almas Karove kenishinen óndirildi. Ol osy kenishten tabylǵan salmaǵy 1 myń karattan asatyn onynshy almas boldy, – dedi ol jergilikti SABC radıostantsııasyna.
Іri almas Mega Diamond Recovery rentgendik qondyrǵysynyń kómegimen anyqtalǵan. Bul tehnologııa kendi usaqtaý kezeńine deıin taý jynysynyń ishindegi iri almastardy tabýǵa múmkindik beredi.
Karove kenishi tolyq óndiristik qýatyna 2012 jyly shyqqan. Ol álemdegi asa iri almastar óndiriletin eń tanymal ken oryndarynyń biri sanalady. Munda buǵan deıin Lesedi La Rona (1109 karat), Sewelo (1758 karat) jáne Motswedi (2488 karat) sııaqty áıgili almastar tabylǵan.
Qazirgi ýaqytta ashyq ádispen ıgerilip jatqan karerdiń tereńdigi 324 metrge jetken. Kompanııa 2028 jyldyń basynda paıdalanýǵa beriletin jerasty kenishiniń qurylysyn bastap ketti. Onyń jobalyq tereńdigi 767 metrdi quraıdy, al ken óndirý jumystary 2040 jylǵa deıin jalǵasady.
Aıta keteıik, osyǵan deıin ǵalymdar paıdaly qazbalardy óndirýdiń jańa tehnologııasyn oılap tapqany týraly jazdyq.
