Bóten adamnyń bank kartasymen shopıng jasaǵan elorda turǵyny ustaldy
NUR-SULTAN. QazAqparat – Astana turǵyny bóten adamnyń bank kartasyn paıdalanǵany úshin ustaldy. Bul týraly Nur-Sultan qalalyq polıtsııa departamentiniń baspasóz qyzmeti málimdedi, dep habarlaıdy QazAqparat tilshisi.
«Polıtsııaǵa 34 jastaǵy Nur-Sultan qalasynyń turǵyny júgindi. Onyń bank kartasynan aqsha urlanǵan. Ótinish berýshi uqypsyzdyǵy saldarynan bıyl maýsym aıynyń basynda bank kartasyn joǵaltyp alǵan. Ol kartadan aqsha alynǵany týraly sms-habarlama kelgen kezde ǵana joǵaltqanyn baıqaǵan. Aqsha urlaý faktisi boıynsha qylmystyq is qozǵaldy. Tergeý barysynda 20 jastaǵy elorda turǵyny anyqtalyp, qamaýǵa alyndy. Kúdikti jaýap berý kezinde bank kartasyn kósheden taýyp alyp, aqshany óz qalaýynsha jumsaýdy uıǵarǵanyn aıtty. Áreketteriniń qylmystyq is ekenin túsinbegen boıjetken 35 000 teńgege shopıng jasaǵan», - dep habarlady baspasóz qyzmeti.
Bul jaǵdaıda qyzdyń áreketinde QR Qylmystyq kodeksiniń 88-babynda (urlyq) kórsetilgen quqyqbuzýshylyq belgileri baıqalady.
Sonymen qatar, sońǵy eki aptanyń ózinde joǵalǵan bank kartalarynan aqsha urlaǵany úshin bes adam qylmystyq jaýapkershilikke tartylǵan. Barlyq jaǵdaıda bank kartalaryn taýyp alǵan turǵyndar adal joldan taıyp, paıdany oılaǵan. Sol sebepti qylmystyq jazaǵa tartyldy.
«Nur-Sultan qalalyq polıtseıleri bank kartalaryn joǵaltqan jaǵdaıda urlyqtyń aldyn alý úshin birden bankke habarlasyp, kartany bloktap tastaýǵa keńes beredi. Nemese pın-kod engizbeı jasalatyn saýdanyń lımıtin shekteý qajet. Bóten adamnyń bank kartasyn tapqan azamattardan tabylǵan zattar bıýrosyna nemese «102»-ge habarlasyp, tabylǵan zatty jaqyn mańdaǵy polıtsııa pýnktine aparyp berýdi suraıdy», - dedi mekemedegiler.
