Bóten adamnyń kartasyn paıdalanǵandar 7 jylǵa deıin bas bostandyǵynan aıyrylýy múmkin
ASTANA. KAZINFORM – 2025 jylǵy 15 shildeden bastap QR Qylmystyq kodeksine engizilgen ózgeristerge sáıkes, 232-baptyń 1-bólimimen keıbir qylmystarǵa qarsy zańnama kúsheıtildi. Bul norma bank kartalary men tólem quraldaryn zańsyz paıdalaný arqyly jasalatyn qylmystardyń jolyn kesýge baǵyttalǵan.
Atalǵan zań normasyna qatysty túsinikteme bergen Astana qalasy prokýratýrasynyń sotqa deıingi tergep-tekserý men qylmystyq qýdalaýdyń zańdylyǵyn qadaǵalaý basqarmasynyń prokýrory Baltabekov Nurıslam Baıkaluly bul baptyń úsh negizgi zańsyz áreketti qamtıtynyn atap ótti.
— ıAǵnı bul — paıdakúnemdik maqsatta ózge tulǵalarǵa: banktik shotqa, kartaǵa nemese tólem quraldaryna qoljetimdilikti zańsyz usyný, berý nemese alý; ózge tulǵanyń paıdasyna zańsyz tólemder nemese aqsha aýdarymdaryn jasaý; zańsyz tólemder jasaý maqsatynda basqa adamdardyń tólem quraldaryna qoljetimdilikti ıemdený, — dedi ol.
Osylaısha, jańa zań boıynsha kartany bóten adamǵa berý, ózge tulǵa úshin aýdarym jasaý, bireýdiń kartasyn zańsyz paıdalaný barlyǵy qylmystyq jaýaptylyqqa ákep soǵady. Bul rette, materıaldyq shyǵynnyń bolýy nemese bolmaýy mańyzdy emes — quqyqbuzýshylyq faktisiniń ózi qylmystyq jazaǵa negiz bolady.
Sonymen qatar ol sózinde qylmystyq jaýaptylyq keltirilgen zalaldyń mólsherine baılanysty aýyrlatylýy múmkin ekenin atap ótti. Atap aıtqanda 200 AEK mólsherinde — eleýli zalal, 500 AEK mólsherinen joǵary — iri zalal retinde baǵalanady.
— Zańǵa sáıkes, mundaı qylmystar úshin 160 AEK kóleminde aıyppul, túzetý jumystary nemese 50 táýlikke deıin qamaýǵa alý jazalary qoldanylady. Al asa aýyr jaǵdaılarda — 7 jylǵa deıin bas bostandyǵynan aıyrý nemese shekteý jazasy kózdelgen, — dedi maman.
Sonymen qatar jańa normada qylmystyq jaýaptylyqtan bosatý múmkindigi de qarastyrylǵan. Eger adam bul qylmysty birinshi ret jasap, óz erkimen quqyq qorǵaý organdaryna qylmys jaıly habarlap, onyń ashylýyna belsendi yqpal etse, ári onyń áreketinde basqa qylmystyq quram bolmasa — qylmystyq jaýaptylyqtan bosatylady.
Eske sala keteıik, 2025 jyldyń basynan beri kıberqylmys boıynsha 6 uıymdasqan qylmystyq top anyqtalǵan bolatyn.