Bótelkege arnalǵan aqyldy qaptama sábıdiń tamaqtaný daǵdysyn ata-anasyna aıtyp otyrady
ASTANA. QazAqparat - Aık Ofner men Den Gıleı jańa týǵan sábıleri bar ata-analardyń qarbalas ómirlerin barynsha jeńildetetin gadjet oılap shyǵardy, dep habarlady sheteldik BAQ.
Sleevely - balalar taǵamy úshin standartty bótelkelerge arnalǵan arnaıy qondyrǵy. Ol balanyń qansha tamaq jep, qanshasyn qaldyrǵanyn avtomatty túrde ólshep, taǵamnyń temperatýrasyn, daıyn ónimniń jaramdylyq merzimin jiti qadaǵalap, onyń qashan ótetindigin eskertip otyrady.
Barlyq erekshelik tek osy ǵana emes. Qurylǵy smartfondarǵa arnalǵan mobıldik qosymshamen de jumys istep, balanyń tamaqqa degen tábetin, táýlik ishinde qansha tamaq tutynǵanyn avtomatty túrde esepteıdi.
Osylaısha Sleevely kóptegen ata-analar sábı dúnıege kelgennen keıin júrgizip otyratyn kúndeliktiń ornyn tolyǵymen almastyra alady. Qurylǵy standartty batareıkamen jumys isteıdi ári ony ydys-aıaq jýatyn mashınada jýýǵa bolady.
Gadjetti oılap shyǵarǵan azamattar óz ónimderine patent alý úshin qarjy jınaýda jáne aǵymdaǵy jyldyń jeltoqsanynda tutynýshylarǵa alǵashqy úlgisin usynýdy maqsat etýde.
