Botaı qonysynda qazba jumystarynyń bastalǵanyna bıyl 40 jyl toldy
Oblystyq mádenıet, arhıvter jáne qujattama basqarmasynyń málimetinshe, bıyl óńirde basymdyq berilgen mereıtoılardyń sany onǵa jýyq. Ábý Nasyr ál Farabıdiń 1150 jyldyǵy, Altyn Ordanyń qurylǵanyna 750 jyldyǵy, Abaıdyń 175 jyldyǵy, Uly Jeńistiń 75 jyldyǵy. Bul mereıli datalar el kóleminde atalyp ótedi. Budan basqa jergilikti deńgeıde toılanatyn mereıtoılar da bar. Sonyń biri – qazaqtyń aqyn-jazýshysy Sábıt Muqanovtyń 120 jyldyǵy bolsa, endi biri – Botaı qonysynda arheologııalyq qazba jumystarynyń bastalǵanyna 40 jyl tolýy. Osyǵan oraı óńirde birqatar is-sharalar josparlanǵan.
Al Soltústik Qazaqstan memlekettik arhıvi jylda ataýly jáne este qalarlyq kúnderdiń kúntizbesin jasaıdy. Bıyl ol qalyń kitap bolyp jaryqqa shyqty.
«Bıyl elimizde atalyp ótetin ataýly kúnderdiń árqaısysyna SQO-nyń qatysy bar. Máselen byltyr Ýálıhanov aýdanynda Altyn Orda dáýirine jatatyn tarıhı eskertkish tabyldy. «Qyzyl Oba» atanǵan mazarlar – Joshy han urpaǵyna tıesili. Bul bizdiń soltústik ólkeniń damyǵan Qazaqstannyń bir bóligi bolǵandyǵynyń dáleli sanalady», - deıdi Soltústik Qazaqstan memlekettik arhıviniń dırektory Sáýle Málikova.
Uly Jeńistiń 75 jyldyǵy ár qazaqstandyq úshin mańyzdy data. Sáýle Málikovanyń aıtýynsha, óńirden 100 myńǵa jýyq adam soǵysqa qatyssa, sonyń teń jartysy elge qaıtyp oralmady. SQO-dan Keńes Odaǵynyń 55 Batyry shyqsa, bıyl solardyń ekeýiniń - Jálel Qızatov jáne Ábý Dosmuhambetovtyń týǵanyna 100 jyl tolmaq.
«Keńes Úkimetiniń jaǵymsyz jaqtaryn shyǵarmalaryna negiz etken halyq sazgeri, ánshi, aqyn Úkili Ybyraıdyń dúnıege kelgenine 160 jyl tolmaq. Ony Úkimet jaı ǵana qýdalap qoıǵan joq, 72 jasynda qarttyǵyna qaramastan atý jazasyna kesti. Bul úlken toılardy, Memleket basshysynyń sózimen aıtatyn bolsaq, toı retinde ǵana emes, bizge oı salatyndaı etip, rýhanı jańǵyrýymyzǵa jol ashatyndaı etip ótkizýimiz kerek», - deıdi Sáýle Málikova.
