«Botaı» qonysynda ashyq aspan astyndaǵy mýzeı salynady - SQO
Oblys ákiminiń orynbasary Dáýren Jandarbektiń aıtýynsha, birer jylda «Botaı» ashyq aspan astyndaǵy mýzeı qosylýy múmkin. Qazir bul másele joǵary deńgeıde sheshilip jatyr.
Soltústik Qazaqstan oblysynda týrıstik maýsym ashyldy. Shalqar-Imantaý kýrorttyq aımaǵyndaǵy 38 týrıstik baza demalýshylardy qabyldaýǵa ázir.
Shalqar-Imantaý kýrorttyq aımaǵy Qazaqstannyń basymdyq berilgen týrıstik aýmaǵynyń ondyǵyna engen. Byltyr osy aımaqtaǵy demalys bazalaryn jańartýǵa 411 mln teńge bólinip, 10 joba júzege asyryla bastady. Olardyń jeteýinde qurylys jumystary aıaqtalǵan.
«Shalqar-Imantaý kýrorttyq aımaǵy oblystyń týrıstik ortalyǵyna aınalady. Týrıstik salany damytý memlekettik baǵdarlamasy aıasynda biz bul jaqtyń joldaryn jóndep, ınfraqurylym tartamyz. Jyl boıy demalýǵa bolatyn jańa demalys oryndary salynady. Qazirdiń ózinde aıtarlyqtaı jumys jasaldy», - deıdi oblys ákiminiń orynbasary Dáýren Jandarbek.
Jaqynda ashylǵan demalys oryndarynyń biri - «Izýmrýdnoe». Jyl boıy jumys isteıdi. Kottedj úılerge qazirdiń ózinde suranys joǵary. «Shalqar sý» shıpajaıyn kúrdeli jóndeýge 1 mlrd teńge bólindi. 200 oryndyq demalys ornynda jóndeý jumystary qyrkúıek aıynda aıaqtalmaqshy.
Aıyrtaý aýdany - tabıǵaty ásem, ári mádenı mol murasy bar. Týrıstik maýsymnyń ashylý saltanatyna kelgender demalys oryndarymen ǵana tanysyp qoımaı, mundaǵy tarıhı-mádenı nysandarmen tanysýǵa da múmkindik aldy. «Aıǵanym qonysy» mýzeı kesheninde, Qarasaı-Aǵyntaı batyrlardyń memorıaldyq kesheninde boldy.
